“खरं सांगायचं तर…” छगन भुजबळांनी सांगितले गळ्यात नेहमी मफलर परिधान करण्याचे कारण

झी मराठीवरील ‘चला हवा येऊ द्या’ हा लोकप्रिय कार्यक्रम कायमच चर्चेत असतो. केवळ महाराष्ट्रातच नाही, तर जगाच्या कानाकोपऱ्यातील प्रेक्षकांकडून या कार्यक्रमाला पसंती मिळाली. या लोकप्रिय कार्यक्रमात अनेक राजकीय मंडळी सहभागी झाली आहेत. नुकतंच प्रदर्शित झालेल्या कार्यक्रमात राष्ट्रवादी काँग्रेसचे नेते छगन भुजबळ सहभागी झाले होते. या कार्यक्रमात छगन भुजबळ यांना विविध गोष्टींबद्दल प्रश्न विचारण्यात आले होते. 'चला हवा येऊ द्या' या कार्यक्रमात अभिनेता निलेश साबळे याने छगन भुजबळांना विविध प्रश्न विचारले. यावेळी त्यांनी राजकीय विषयांसह अनेक कौटुंबिक विषयांवरही मोकळ्या गप्पा मारल्या. या कार्यक्रमादरम्यान ते गळ्यात मफलर का घालतात याबद्दल भाऊ कदम यांनी विनोदी स्किट सादर केले. या दरम्यान भाऊ कदम यांनी त्यांच्याकडे वेगवेगळे मफलर आहे. ते एकदा परिधान केलेला मफलर पुन्हा वापरत नाही, असेही सांगितले. या सादरीकरणानंतर छगन भुजबळ यांना तुम्ही गळ्यात नेहमी मफलर का परिधान करता? असा प्रश्न निलेश साबळेने विचारला. तसेच तुम्हाला ही स्टाईल तुम्हाला कशी सुचली? असा प्रश्नही त्यांना विचारण्यात आला. त्यावर त्यांनी यामागचे खरे कारण सांगितले. यावेळी ते म्हणाले, "खरं सांगायचं तर माझ्या डाव्या खांद्याचे ऑपरेशन झाले होते." "त्यावेळी त्याला थंडी वैगरे लागू नये म्हणून मग मी मफलर परिधान करायचा असे ठरवले." "त्यानंतर मग प्रत्येकाची काही तरी स्टाईल असते, हे मला जाणवले." "मग माझीही काही तरी स्टाईल असावी, असे मला वाटलं." "त्यात ही स्टाईल मलाही आवडायला लागली." "त्यामुळे मी ते मफलर घालायला लागलो." "त्यामुळे मी आता कुठेही गेलो तरी मला शाल देणं टाळतात आणि त्याऐवजी मफलर दिले जातात." "शाल जोड्यातले पण देतात. पण शालींची संख्या कमी झाली आहे." "कुठेही फिरायला गेलो किंवा एखाद्या सभेला गेलो की तिकडेही मफलर दिले जातात." "त्यामुळे आपोआप मफलरचा ढीग वाढत चालला आहे." "मला कार्यक्रमाला जाण्यापूर्वी जे मफलर हातात येते ते मी परिधान करतो", असे छगन भुजबळ यांनी सांगितले.