Photos : सोनाली कुलकर्णी कुटुंबियांबरोबर पोहचली वाघा बॉर्डरवर; म्हणाली, “खरी देशभक्ती…”

मराठी चित्रपटसृष्टीतील ‘अप्सरा’ अशी ओळख असलेली अभिनेत्री सोनाली कुलकर्णीने अल्पावधीतच अभिनयाने प्रेक्षकांच्या मनावर छाप पाडली. सोनाली सौंदर्य आणि तिच्या नखरेल अदांनी चाहत्यांना कायमच भूरळ पाडत असते. तिच्या वेगवेगळ्या लुक्सची चर्चा होत असते. नुकतीच ती आपल्या कुटुंबाबरोबर वाघा बॉर्डर अंतर येथे गेली होती. तिकडचे फोटो तिने शेअर केले आहेत. 'कित्येक वर्षांची इच्छा आज पूर्ण झाली' अशा शब्दात तिने आपल्या भावना व्यक्त केल्या आहेत. वाघा बॉर्डर ही भारत पाकिस्तान या देशाची सीमा आहे. भारताची शेवटची हद्द मानली जाते. या बॉर्डरवर रोज ‘बीटिंग द रिट्रीट सेरेमनी’ (Beating Retreat Ceremony) हा कार्यक्रम आयोजित केला जातो. या दरम्यान भारत आणि पाकिस्तान देशांचे सैनिक संचलन करतात. हे संचलन पाहण्यासाठी देशभरातून लोक येतात. करोनामुळे गेली २ वर्ष ‘बीटिंग द रिट्रीट’ सोहळ्यास उपस्थित राहण्यास प्रेक्षकांना बंदी घालण्यात आली होती. आता ही बंदी उठवण्यात आली असून हा सोहळा पाहण्यासाठी भारतीय नागरिकांबरोबर पाकिस्तानी नागरिकही मोठी गर्दी करतात. वाघा बॉर्डरपासून पाकिस्तानचे लाहोर हे शहर २२ कि.मी. वर आहे. सोनालीचा चाहता वर्ग मोठा असून ती सोशल मीडियावरून चाहत्यांच्या संपर्कात राहण्याचा प्रयत्न करते. सध्या सोनाली ‘डान्स महाराष्ट्र डान्स’ शोमध्ये परिक्षकाच्या भूमिकेत आहे. फोटो सौजन्य : इन्स्टाग्राम