“अस्सल दादरकर, आठ वर्षांचे रिलेशनशिप, लग्न अन्…” ‘बिग बॉस’मुळे चर्चेत आलेल्या अपूर्वा नेमळेकरबद्दल माहितीये का?

अभिनेत्री अपूर्वा नेमळेकर ही घराघरांत लोकप्रिय आहे. आज अपूर्वाचा वाढदिवस आहे. छोट्या पडद्यावर सर्वाधिक चर्चेत असलेला शो बिग बॉसमुळे अपूर्वा प्रसिद्धीझोतात आली. या कार्यक्रमात सर्वाधिक चर्चेत राहिलेली अभिनेत्री म्हणून तिला ओळखले जाते. अपूर्वाचा जन्म २७ डिसेंबर १९८८ ला मुंबईच्या दादर येथे झाला. अपूर्वा दादरमध्येच लहानाची मोठी झाली. किंग जॉर्ज विद्यालयातून अपूर्वाने दहावीपर्यंचे शिक्षण घेतलं. अपूर्वाच्या वडिलांचे नाव सुभाष नेमळेकर आहे. तर तिच्या आईचे नाव सुप्रिया नेमळेकर आहे. अपूर्वाचं नॅशनल कॉलेज वांद्रे आणि त्यानंतर रुपारेल कॉलेज अशा दोन ठिकाणी महाविद्यालयीन शिक्षण पूर्ण झालं. कॉलेजमध्ये असतानाच अपूर्वाकडे मालिकेसाठी विचारणा झाली होती. मात्र तिने ती करण्यास नकार दिला होता. अभिनय क्षेत्रात येणे हीच नियती होती, असे मानणाऱ्या अपूर्वाने या क्षेत्रात येण्याबद्दल कधीच विचार केला नव्हता. पदवीचं शिक्षण पूर्ण होत असतानाच अपूर्वाला ‘आभास हा’ मालिकेतील आर्या नावाच्या मुख्य नायिकेच्या व्यक्तिरेखेसाठी आयरिश निर्मिती संस्थेकडून विचारणा झाली. ‘आभास हा’ मालिकेतील व्यक्तिरेखा अपूर्वाच्या वयोगटातल्या मुलीची असल्यामुळे तिने या भूमिकेसाठी होकार दिला. अभिनयाच्या क्षेत्रात स्थिरस्थावर झाल्यावरही अपूर्वाने इमिटेशन ज्वेलरी डिझाइनिंगचा स्वत:चा ब्रॅण्ड विकसित केला आहे. अपूर्वा नेमळेकरच्या खासगी आयुष्याबद्दल अनेकदा चर्चा रंगताना दिसतात. तिचे खासगी आयुष्य फारच चर्चेत राहिले आहे. अपूर्वा नेमळेकर बिग बॉसमध्ये अनेकदा तिच्या सिंगल असण्याबद्दल बोलली आहे. अनेकदा ती कार्यक्रमातही याबद्दल खुलासा करत असते. अपूर्वा नेमळेकरचा प्रेमविवाह झाला होता. काही महिन्यांनी मात्र त्यांचा घटस्फोट झाला. अपूर्वा नेमळेकरच्या पूर्वाश्रमीच्या पतीचे नाव रोहन देशपांडे असे होते. त्यांचा विवाह २०१४ मध्ये पार पडला होता. ते दोघेही एकमेकांचे चांगले मित्र होते. अपूर्वा नेमळेकर आणि रोहन देशपांडे हे ८ वर्षांपासून एकमेकांना ओळखत होते. ८ वर्षांच्या रिलेशनशिपनंतर ते लग्नबंधनात अडकले होते. मुंबईत पारंपारिक पद्धतीने त्या दोघांचा लग्नसोहळा पार पडला होता. पण त्यांचं नातं फार काळ टिकू शकलं नाही. लग्नानंतर काही वर्षांनी त्यांच्यात खटके उडण्यास सुरुवात झाली. त्यामुळे त्यांचा घटस्फोट झाला. तिच्या रिलेशनशिपबद्दल अनेकदा चर्चा सुरु असते. पण तिने त्याकडे कधीही लक्ष दिलं नाही. खासगी आयुष्यातील वादानंतर आता ती तिने तिच्या करिअरवर लक्ष केंद्रीत केले. त्याबरोबर ‘ती एका पेक्षा एक जोडीचा मामला’ यामध्येही झळकली होती. तिची ‘रात्रीस खेळ चाले’ ही मालिका चांगलीच गाजली. या मालिकेच्या दोन्हीही भागात तिने काम केले. 'रात्रीस खेळ चाले' मालिकेतील 'शेवंता'च्या भूमिकेमुळे ती प्रसिद्धीझोतात आली. तिने ‘आराधना’ या मालिकेतही काम केले होते. त्याबरोबर ‘तू माझा सांगती’ या मालिकेतही तिने उत्तम काम केले आहे. या बरोबरच अपूर्वा ही 'स्वराज्य सौदामिनी ताराराणी' या मालिकेत राणी चेंनम्मा यांच्या भूमिकेत झळकली होती. ही तिची पहिलीच ऐतिहासिक भूमिका होती. 'झी मराठी'वरील 'एका पेक्षा एक, जोडीचा मामला', 'कलर्स मराठी'वरील 'तू माझा सांगाती', 'झी मराठी'वरील 'रात्रीस खेळ चाले २' या मालिकांमध्येही अपूर्वाने काम केलं आहे. अपूर्वाने ‘भाखरवाडी ७ किमी’, ‘इश्कवाला लव्ह’सारख्या चित्रपटांमधून काम केले आहे. (फोटो सौजन्य- अपूर्वा नेमळेकर/इन्स्टाग्राम)