Photos: खुशबू आणि तितिक्षा तावडेच्या अनोख्या रक्षाबंधनाची सोशल मीडियावर चर्चा

Raksha Bandhan 2023: रक्षाबंधन म्हणजे भावंडांमधील अनोखे बंधन अगदी जिव्हाळ्याचा सण !! या सणाला बहीण भावाला राखी बांधते आणि भाऊ छानशी भेटवस्तू देतो. प्रत्येकजण हा सण आनंदाने साजरा करत असतो. हा सण कलाकारमंडळीही अनोख्या पद्धतीने साजरा करत असतात. कुणी एखादी पोस्ट लिहितो, कुणी फोटो शेअर करतो तर कुणी त्यांच्या घरगुती सोहळ्याचे फोटो चाहत्यांबरोबर शेअर करत असतात. झी मराठीवरील नवीन मालिका 'सारं काही तिच्यासाठी' या मालिकेतील अभिनेत्री खुशबू तावडेने आपल्या खास आठवणी शेअर केल्या आहेत. रक्षाबंधनाचा दिवस आमच्यासाठी जिव्हाळ्याचा राहिला आहे कारण घरात नेहमीच खेळीमेळीचं वातावरण राहिल आहे. दरवर्षी सकाळी पहिली राखी देवाला, दुसरी राखी आमच्या बाबांना आणि तिसरी राखी मी आणि तितिक्षा एकमेकींना बांधायचो. लहानपणी जेव्हा कळतं वय नव्हतं तेव्हा फक्त भेटवस्तूंसाठी राखी बांधायचो. पण जेव्हा मोठे झालो तेव्हा कळायला लागलं तेव्हापासून बहिणीचं हे बंधन आणि नातं जोपासण्यासाठी आम्ही हा सण साजरा करायचं ठरवले. या वर्षीचं रक्षाबंधन आमच्यासाठी खास आहे कारण आम्ही दोघी बहिणी झी मराठीवरील दोन मालिकांमध्ये मुख्य भूमिकेत काम करत आहोत व ही आमच्यासाठी खूप आनंदाची गोष्ट आहे. माझी नवीन मालिका जी दोन बहिणींवर आधारित आहे व या मालिकेच्या प्रोमोशन निमित्ताने आम्ही दोघींनी पूर्ण महिना साजरा केला आहे. आम्ही एकमेकींना भेट वस्तू पण दिल्या आहेत. या वर्षी कितीही कामात व्यग्र असलो तरीही एकमेकींसाठी नक्की वेळ काढून भेटणार आहोत व हा दिवस साजरा करणार आहोत. प्रत्येक बहिणींनी आपली नाती जपावी हा संदेश तर आम्ही आमच्या मालिकेतून देतच आहोत. रक्षाबंधनाच्या निमित्ताने सगळ्यांना माझ्याकडून खूप खूप शुभेच्छा. (सर्व फोटो सौजन्य : खुशबू तावडे आणि तितिक्षा तावडे/ इन्स्टाग्राम) (हेही पाहा : जांभळ्या ब्लेझर सूटमध्ये रसिका सुनीलचा बोल्ड अंदाज)