लेकीच्या लग्नात आमिर खान-रीना दत्ताने वेधलं लक्ष, तर विहीणबाईंचा साधा अंदाज, आयरा खान-नुपूर शिखरेच्या लग्नाचे फोटो पाहिलेत का?

आमिर खानची लाडकी लेक आयरा खान व नुपूर शिखरेचा शाही विवाहसोहळा उदयपूरमध्ये १० जानेवारीला पार पडला. आयरा खान - नुपूर शिखरेने उदयपूरमध्ये ख्रिश्चन पद्धतीने लग्न केलं. दोघांच्या लग्नसोहळ्यातील अनेक फोटो सध्या सोशल मीडियावर व्हायरल होत आहेत. आयराने लग्नात पांढरा शुभ्र गाऊन आणि नुपूरने बेज रंगाचा फॉर्मल सूट परिधान केला होता. आयराने आई रीना दत्ता आणि वडील आमिर खान यांच्यासह लग्नमंडपात एन्ट्री घेतली. दोघेही लाडक्या लेकीला एकत्र घेऊन आले. नुपूर शिखरेने लग्नमंडपात आपल्या आईबरोबर डॅशिंग अंदाजात एन्ट्री घेतली. आयरा-नुपूरच्या लग्नाचे फोटो पाहून नेटकरी प्रितम शिखरे यांच्या साधेपणाचं कौतुक करत आहेत. आमिरच्या विहीणबाईंनी लग्नात साधी व सुंदर अशी पेस्टल रंगाची साडी नेसली होती. आयरा-नुपूरचं लग्न झाल्यावर उपस्थितांनी त्यांच्यावर फुलांचा वर्षाव केला. तसेच लाडक्या लेकीला नववधूच्या रुपात पाहून आमिर काहीसा भावुक झाल्याचं पाहायला मिळालं. दरम्यान, आयरा-नुपूरच्या लग्नसोहळ्यातील फोटोंवर नेटकऱ्यांनी कौतुकाचा वर्षाव केला आहे. यानंतर १३ जानेवारीला या दोघांनी बॉलीवूड सेलिब्रिटींसाठी रिसेप्शन पार्टीचं आयोजन केलं आहे. ( सर्व फोटो सौजन्य : आयरा खान व etherealstudio.in इन्स्टाग्राम )