सहकलाकाराशी डेटिंगच्या चर्चा ते लोकप्रिय मालिकांमध्ये भूमिका; कोण आहे BIGG BOSS 18 मधील टीव्ही अभिनेत्री ॲलिस कौशिक?

प्रसिद्ध टीव्ही रिॲलिटी शो बिग बॉस पुन्हा एकदा प्रेक्षकांच्या मनोरंजनासाठी परतला आहे. ६ ऑक्टोबर रोजी बिग बॉसच्या १८ व्या सीझनची सुरुवात झाली. यंदाही बिग बॉसचा सीझन खुद्द बॉलीवूड स्टार सलमान खान होस्ट करणार आहे. या १८ व्या सीझनसाठी शोमध्ये अनेक टीव्ही कलाकार स्पर्धक म्हणून आले आहेत. यादरम्यान अभिनेत्री ॲलिस कौशिक या सीझनची १८ वी स्पर्धक म्हणून बिग बॉसमध्ये दिसणार आहे आणि सध्या अभिनेत्री चर्चेत आहे. ॲलिसबद्दल बोलायचे झाले, तर ॲलिस ही मुळची दिल्लीची आहे. तिने तिचे संपूर्ण शिक्षण हे दिल्ली युनिव्हर्सिटीमधून पूर्ण केले आहे. पुढे अभिनयातील आवडीसाठी ती मुंबईत आली. ॲलिसने अनेक हिंदी मालिकेंमध्ये काम केलं आहे. सोनी टीव्हीवरील 'सूर्य पुत्र कर्ण' या मालिकेतून तिने हिंदी मनोरंजनसृष्टीत प्रवेश केला. यानंतर ॲलिसने 'कहाँ हम कहाँ तुम' आणि 'काटेलाल अँड सन्स' या मालिकेंमध्येही काम केलं. स्टार प्लस वाहिनीवरील 'पंड्या स्टोर' या मालिकेमध्ये 'रावी' या भूमिकेमुळे ॲलिसला एक वेगळी ओळख मिळाली. मालिकेमधील तिच्या अभिनयामुळे ती प्रेक्षकांच्या पसंतीस उतरली. 'पंड्या स्टोर'मध्ये 'शिवा'ची भूमिका साकारणारा अभिनेता कंवर ढिल्लन आणि ॲलिसच्या जोडीनं सर्वांचं लक्ष वेधून घेतलं होतं. सोशल मीडियावर अनेकदा त्यांच्या डेटिंगच्या चर्चा रंगायच्या; काही वेळानंतर इन्स्टाग्रामवर फोटो शेअर करत दोघांनी आपल्या प्रेमाची कबुली दिली. कंवरने सोशल मीडियावर ॲलिसला बिग बॉसच्या प्रवासासाठी शुभेच्छा दिल्या. ॲलिसच्या वैयक्तिक जीवनात झालेल्या गोष्टींना मागे टाकून तिने आपल्या आयुष्यात प्रगती केली, याबद्दल सलमान खाननेदेखील तिचे कौतुक केले.(फोटो: ॲलिस कौशिक/इन्स्टाग्रामवर)