जुन्या जोडीची नवीन मालिका! ‘ठरलं तर मग’ची वेळ बदलणार, ‘स्टार प्रवाह’च्या नव्या सिरीयलमध्ये कोण-कोण झळकणार?

'स्टार प्रवाह' वाहिनीवर येत्या २८ एप्रिलपासून ‘कोण होतीस तू काय झालीस तू’ ही नवीन मालिका प्रेक्षकांच्या भेटीला येत आहे. या नव्या मालिकेच्या माध्यमातून गिरीजा प्रभू व मंदार जाधव यांची जोडी पुन्हा एकदा प्रेक्षकांच्या भेटीला येणार आहे. प्रेक्षकांचे लाडके गौरी-जयदीप आता कावेरी अन् यशच्या रुपात सर्वांचं मनोरंजन करतील. या मालिकेत अनेक दमदार कलाकार महत्त्वपूर्ण भूमिका साकारताना दिसणार आहेत. गिरीजा प्रभूच्या ( कावेरी ) बाबांची भूमिका या मालिकेत अभिनेते वैभव मांगले साकारणार आहेत. तर, कावेरीच्या बहिणीच्या भूमिकेत अभिनेत्री अमृता माळवदकर झळकेल. तसेच मंदारच्या भावाचं उदय हे पात्र अभिनेता अमित खेडेकर साकारणार आहे. मंदार या मालिकेत यश धर्माधिकारी ही भूमिका साकारणार आहे. त्याच्या धर्माधिकारी कुटुंबात कोण-कोण आहे जाणून घेऊयात... या मालिकेत यशच्या आईची भूमिका अभिनेत्री सुकन्या मोने साकारणार आहेत. तसेच अभिनेते सुदेश म्हाशीलकर, साक्षी महाजन, भाग्यश्री पवार असे अनेक कलाकार या मालिकेत महत्त्वपूर्ण भूमिकेत झळकतील. याशिवाय, नंदिनी वैद्य आणि 'सहकुटुंब सहपरिवार' फेम अभिनेत्री साक्षी गांधी सुद्धा या मालिकेत महत्त्वाची भूमिका साकारणार आहे. दरम्यान, नवीन मालिका २८ एप्रिलपासून रात्री ८ वाजता प्रसारित केली जाणार आहे. यामुळे 'ठरलं तर मग' मालिकेची सध्याची ८:१५ ची वेळ बदलून पुन्हा एकदा ८:३० करण्यात येईल. ( सर्व फोटो सौजन्य : स्टार प्रवाह वाहिनी )