ना मुंबई, ना पुणे…; मराठी अभिनेत्रीने निसर्गाच्या सानिध्यात घेतलं नवीन घर, दारावरची सुंदर नेमप्लेट पाहिलीत का?

मराठी मालिका आणि चित्रपटांमधून घराघरांत लोकप्रिय झालेली अभिनेत्री म्हणजेच साक्षी गांधी. सध्या साक्षी वैयक्तिक आयुष्यातील एका खास गोष्टीमुळे चर्चेत आली आहे. तिने चिपळूण येथे नवीन घर घेतलं आहे. साक्षी गांधीने नुकतेच आपल्या नव्या घराचे सुंदर फोटो अन् व्हिडीओ इन्स्टाग्रामवर शेअर केले आहेत. अभिनेत्रीने नव्या घराचा व्हिडीओ शेअर करत “…आणि घर झालं #चिपळूण #नवीन घर” असं कॅप्शन दिलं आहे. साक्षीने शेअर केलेल्या फोटोंमध्ये अभिनेत्री व तिचे कुटुंबीय नव्या घरात गृहप्रवेश व वास्तुशांती पूजा करत असल्याचं पाहायला मिळत आहे. अभिनेत्रीच्या नव्या घराच्या दारावरच्या पाटीवर सर्व कुटुंबीयांची नावं लावली आहेत. “श्री. महेश सौ. शर्मिला साक्षी क्षितिजा गांधी” असं नाव अभिनेत्रीच्या नव्या घराच्या नेमप्लेटवर लिहिण्यात आलं आहे. साक्षीचं नवं घर पाहताच सिनेविश्वातील तिच्या मित्र-मैत्रिणींनी अभिनेत्रीवर कौतुकाचा वर्षाव केला आहे. दरम्यान, साक्षी गांधीच्या कामाबद्दल सांगायचं झालं, तर सध्या ती ‘स्टार प्रवाह’च्या ‘कोण होतीस तू काय झालीस तू’ या नव्या मालिकेत यमुना ही भूमिका साकारत आहेत. ( सर्व फोटो सौजन्य : साक्षी गांधी इन्स्टाग्राम अकाऊंट )