माधुरी दीक्षितच्या मोठ्या मुलाने ‘या’ विषयात पूर्ण केलं शिक्षण! अमेरिकेत झाला पदवीधर, डॉ. नेनेंनी शेअर केले खास फोटो…

अभिनेत्री माधुरी दीक्षितला दोन मुलं आहेत. तिच्या मोठ्या मुलाचं नाव अरिन आहे तर, धाकट्या मुलाचं नाव रायन असं आहे. माधुरीचा मोठा मुलगा अरिन नुकताच अमेरिकेतील नामांकित विद्यापीठातून पदवीधर झाला आहे. माधुरीचे पती डॉ. नेनेंनी लाडक्या लेकाचं कौतुक करत खास इन्स्टाग्राम पोस्ट शेअर केली आहे. अरिन नेने याने दक्षिण कॅलिफोर्निया विद्यापीठातील ‘विटेर्बी स्कूल ऑफ इंजिनिअरिंग’मधून कॉम्प्युटर सायन्स अँड बिझनेस अॅडमिनिस्ट्रेशन या विषयात पदवी मिळवली आहे. माधुरी लेकाबद्दल म्हणते, “मला अरिनचा खूप जास्त अभिमान वाटतोय. सगळ्या विद्यार्थ्यांचं कौतुक करण्यासाठी आज कॉलेजमध्ये खूप सुंदर सोहळा आयोजित करण्यात आला होता. माझ्या अरिनला पुढील आयुष्यासाठी खूप खूप शुभेच्छा” माधुरी आणि तिचे पती डॉ. नेने हे दोघंही अरिनच्या कॉलेजमध्ये त्याला शुभेच्छा देण्यासाठी पोहोचले होते. तर, डॉ. नेने मुलाचं कौतुक करत म्हणतात, “अरिन नेने… ‘विटेर्बी स्कूल ऑफ इंजिनिअरिंग’मधून पदवीधर झाला आहे. पदवीधर झालेल्या सगळ्या मुलांना खूप शुभेच्छा आणि कॉलेजमधील प्राध्यापकांचे खूप खूप आभार…" अरिनने मिळवलेलं शैक्षणिक यश आणि माधुरीचा वाढदिवस या दोन्ही गोष्टी यंदा नेने कुटुंबीयांनी एकत्र साजऱ्या केल्या. असंही डॉ. नेनेंनी त्यांच्या पोस्टच्या कॅप्शनमध्ये नमूद केलं आहे. दरम्यान, सध्या माधुरीचा मुलगा अरिन नेनेवर बॉलीवूडमधून देखील कौतुकाचा वर्षाव करण्यात येत आहे. अनेक कलाकारांनी त्याला पुढील आयुष्यासाठी शुभेच्छा दिल्या आहेत. ( सर्व फोटो सौजन्य : डॉ. श्रीराम नेने इन्स्टाग्राम )