‘स्टार प्रवाह’वरील नव्या मालिकेच्या शूटिंगचा शुभारंभ! ‘या’ दिवशी प्रसारित होणार पहिला एपिसोड, मुख्य भूमिकेत झळकणार…

छोट्या पडद्यावर सध्या नव्या मालिकांची मांदियाळी सुरू झाल्याचं पाहायला मिळत आहे. 'स्टार प्रवाह' वाहिनीवर लवकरच 'लपंडाव' ही नवीन मालिका सुरू होणार आहे. नुकताच या मालिकेचा मुहूर्त सोहळा पार पडला. 'लपंडाव' मालिकेच्या सेटवर मुहूर्ताच्या पूजेने शूटिंगचा शुभारंभ करण्यात आला आहे. ‘लपंडाव’ मालिकेत प्रसिद्ध अभिनेत्री कृतिका देव मुख्य भूमिका साकारणार आहे. तिच्या भूमिकेचं नाव असेल सखी कामत. अभिनेत्री रुपाली भोसले या मालिकेत सखीच्या आईच्या भूमिकेत झळकणार आहे. तेजस्विनी कामत असं तिच्या भूमिकेचं नाव असून, तिला सगळे आदराने ‘सरकार’ म्हणतात. सखी आणि तेजस्विनी या मायलेकींचं एकमेकींशी अजिबात पटत नसतं. या सगळ्यात तेजस्विनी तिच्या लेकीचं लग्न ड्रायव्हरशी ठरवते. ही भूमिका अभिनेता चेतन वडनेरे साकारत आहे. ‘लपंडाव’ ही नवीन मालिका १५ सप्टेंबरपासून प्रेक्षकांच्या भेटीला येणार आहे. ही मालिका दुपारच्या सत्रात प्रसारित केली जाईल. १५ सप्टेंबरपासून सोमवार ते शनिवार दुपारी २ वाजता ही मालिका प्रेक्षकांना ‘स्टार प्रवाह’वर पाहता येईल. मालिकेच्या मुहूर्त सोहळ्याचे फोटो शेअर केल्यावर चाहत्यांनी रुपाली, कृतिका आणि चेतन या तिघांनाही भरभरून शुभेच्छा दिल्या आहेत. ( सर्व फोटो सौजन्य : स्टार प्रवाह वाहिनी )