प्राजक्ता माळीच्या कर्जतच्या फार्महाऊसवर पोहोचली ‘स्टार प्रवाह’ची ‘ही’ नायिका! अनुभव सांगत म्हणाली…

महाराष्ट्राची 'फुलवंती' म्हणून ओळखल्या जाणाऱ्या अभिनेत्री प्राजक्ता माळीचं कर्जतमध्ये आलिशान फार्महाऊस आहे. निसर्गरम्य वातावरणात डोंगराच्या कुशीत सुंदर असं फार्महाऊस असावं अशी प्राजक्ताची अनेक वर्षांपासूनची इच्छा यानिमित्ताने पूर्ण झाली. प्राजक्ता अनेकदा आपल्या कुटुंबीयांसह निवांत वेळ घालवण्यासाठी फार्महाऊसवर जात असते. याशिवाय महाराष्ट्राची हास्यजत्रामधील कलाकार देखील सगळे एकत्र प्राजक्ताच्या फार्महाऊसवर एन्जॉय करण्यासाठी गेले होते. याठिकाणी कुटुंबीय व हास्यजत्रेच्या कलाकारांसह प्राजक्ताने तिचा वाढदिवस साजरा केला होता. प्राजक्ता माळीचं फार्महाऊस सुंदर व्ह्यू, मोठ्या खोल्या, ओपन स्विमिंग पूल, आकर्षक फर्निचर अशा सुखसोयींनी परिपूर्ण आहे. अभिनेत्रीच्या फार्महाऊसचं नाव ‘प्राजक्तकुंज’ असं आहे. प्राजक्ता माळीच्या या आलिशान फार्महाऊसला नुकतीच एका लोकप्रिय अभिनेत्रीने भेट दिली. अभिनेत्री सायली देवधर आपल्या कुटुंबीयांसह 'प्राजक्तकुंज' या फार्महाऊसवर गेली होती. याठिकाणचे फोटो सायलीने सोशल मीडियावर शेअर करत प्राजक्ताला टॅग सुद्धा केलं आहे. सायलीने शेअर केलेल्या फोटोंमध्ये तिच्या संपूर्ण कुटुंबाची झलक पाहायला मिळत आहे. सायली अनुभव सांगत लिहिते, "प्राजक्तकुंज येथे राहण्याचा अनुभव खूपच छान होता. सुंदर दृश्य, अतिशय प्रशस्त व्हिला, अप्रतिम जेवण आणि आदरातिथ्य...थँक्यू! प्राजक्ता आता लवकरच एकत्र पुन्हा फार्महाऊसला जाण्याचं प्लॅनिंग करूयात." सायलीची ही पोस्ट रिशेअर करत प्राजक्ता लिहिते, "Hey Darling अखेर तू आमच्या प्राजक्तकुंजला भेट दिलीस...खूप छान वाटलं." दरम्यान, सायली देवधरच्या वर्कफ्रंटबद्दल सांगायचं झालं, तर 'स्टार प्रवाह'च्या 'लग्नाची बेडी' या मालिकेत तिने प्रमुख भूमिका साकारली होती. या मालिकेने जवळपास ३ वर्षे रसिक प्रेक्षकांच्या मनावर अधिराज्य गाजवल्यावर २०२४ च्या अखेरिस सर्वांचा निरोप घेतला. ( सर्व फोटो सौजन्य : प्राजक्ता माळी व सायली देवधर इन्स्टाग्राम )