गंगा आरती, बोटिंग अन्…; मराठमोळी अभिनेत्री पोहोचली वाराणसीला! अनुभवली बनारसमधील देवदिवाळी, पाहा सुंदर फोटो…

वाराणसी शहराला बनारस किंवा काशी म्हणून देखील ओळखलं जातं. याठिकाणी दरवर्षी मोठ्या उत्साहात देवदिवाळी साजरी केली जाते. देवदिवाळी सुरू झाल्यावर बनारसमध्ये पर्यटकांची तुफान गर्दी होते. अनेक सेलिब्रिटी सुद्धा या दिवसांत बनारसला भेट देतात. 'लाखात एक आमचा दादा' या मालिकेतून घराघरांत लोकप्रिय झालेली अभिनेत्री दिशा परदेशी सुद्धा नुकतीच बनारसला पोहोचली आहे. दिशाने बनारस येथील सुंदर फोटो सोशल मीडियावर शेअर केले आहेत. बनारसला गेल्यावर रामघाट, नमो घाट, अस्सी घाट, दशाश्वमेध घाट अशा विविध ठिकाणी भेट देऊन पर्यटकांना देवदिवाळीचा आनंद घेता येतो. याशिवाय बनारसला गेल्यावर पर्यटक आवर्जून बोटिंग करतात. दिशाने सुद्धा गंगा नदीत बोटिंग करतानाचे फोटो सोशल मीडियावर शेअर केले आहेत. गंगा आरती, लेझर शो, गंगाकिनारी फटाक्यांची आतषबाजी याची झलक दिशाच्या पोस्टमध्ये पाहायला मिळत आहे. दिशाने वाराणसीसह अयोध्येतील राम मंदिराला सुद्धा भेट दिली आहे. दरम्यान, दिशाने शेअर केलेल्या या सुंदर फोटोंवर नेटकरी कौतुकाचा वर्षाव करत आहेत. तुझ्यामुळे आम्हाला वाराणसीचं दर्शन झालं अशा प्रतिक्रिया चाहत्यांनी दिशाच्या फोटोंवर दिल्या आहेत. ( सर्व फोटो सौजन्य : दिशा परदेशी इन्स्टाग्राम )