वयात ९ वर्षांचं अंतर, मालिकेच्या सेटवर मैत्री अन्…; सेलिब्रिटी कपल लग्नबंधनात अडकणार! एकमेकांना प्रेमाने ‘या’ नावाने मारतात हाक

‘लक्ष्मी निवास’ मालिकेतील जयंत म्हणजेच लोकप्रिय अभिनेता मेघन जाधव आज ( १६ नोव्हेंबर ) लग्नबंधनात अडकणार आहे. काही दिवसांपूर्वी सोशल मीडियावर प्रेमाची जाहीर कबुली देत मेघनने लग्न करणार असल्याचं चाहत्यांना सांगितलं होतं. मेघन जाधव व अभिनेत्री अनुष्का पिंपुटकर आता आयुष्यभराचे जोडीदार झाले आहेत. मेघन व अनुष्काच्या यांच्या घरी गेल्या काही दिवसांपासून लगीनघाई सुरू आहे. या दोघांच्या मेहंदी व हळदी समारंभातील फोटो सध्या सोशल मीडियावर व्हायरल होत आहेत. मेघन व अनुष्का यांच्यात ९ वर्षाचं अंतर असून, या दोघांची भेट 'रंग माझा वेगळा' या मालिकेच्या सेटवर झाली होती. 'रंग माझा वेगळा' या मालिकेच्या सेटवर छान मैत्री झाली आणि पुढे या मैत्रीचं रुपांतर प्रेमात झालं असं मेघनने सांगितलं. अभिनेत्याने वर्षभरातच या रिलेशनशिपबद्दल घरच्यांना कल्पना दिली होती. मेघन व अनुष्का एकमेकांना प्रेमाने 'बेंगू' आणि 'बेंगी' अशी हाक मारतात. मेघन आणि अनुष्का कायम एकमेकांना पाठिंबा देताना दिसतात. या दोघांनी एकत्र बिझनेस सुद्धा सुरू केला आहे. काही दिवसांपूर्वीच मेघन व अनुष्का यांचं 'लक्ष्मी निवास' मालिकेच्या टीमने केळवण केलं होतं. या दोघांवर संपूर्ण कलाविश्वातून शुभेच्छांचा वर्षाव करण्यात येत आहे. ( सर्व फोटो सौजन्य : अनुष्का पिंपुटकर व मेघन जाधव इन्स्टाग्राम, sameer_gawde_photography )