Photos : कामाच्या नादात रिकाम्या पोटी चहा पित आहात? शरीराला होणारे ‘हे’ दुष्परिणाम एकदा वाचाच

अनेक लोकांसाठी चहा ही रोजच्या जेवणाप्रमाणेच अतिशय महत्त्वाची असते. किंबहुना त्याहूनही अधिक गरजेची असते, असे म्हटल्यास वावगं ठरणार नाही. घरी पाहुणे आल्यावरही आपण त्यांना आधी चहा घेणार का? असे विचारतो. चहाला अमृत मानणारे अनेक जण आपल्याकडे आहेत. चहा घेतल्याने तरतरी येते किंवा टॉनिक घेतल्यासारखे वाटते असे अनेकांचे म्हणणे असते. मात्र, रिकाम्यापोटी घेतलेला चहा आरोग्यासाठी अतिशय हानिकारक असतो. काश्मिरमधील कावा, ग्रीन टी आणि लेमन टी यासारखा चहा आरोग्यासाठी अतिशय चांगला असतो. आलं, तुळस, लवंग, वेलची आणि दालचिनी यांसारखे पदार्थ घालून केलेला आरोग्यदायी चहाही उत्तम. मात्र, रिकाम्यापोटी चहा घेतल्यास तो आरोग्यासाठी घातक ठरण्याची शक्यता असते. चहामुळे कोणते दुष्परिणाम होतात ते पाहूया… रिकाम्या पोटी चहा पिण्याने पचनतंत्र बिघडते. पोट रिकामे असताना चहा घेतल्यास शरीरातील आम्ल अचानक उसळते. यामुळे अॅसिडिटीचा त्रास होतो. अॅसिडिटीमुळे इतर अनेक समस्या उद्भवतात. रिकाम्या पोटी चहा प्यायल्याने पोटातील अग्नी मंदावतो. त्यामुळे पुढचा बराच वेळ भूक लागत नाही. त्यामुळे आपण पोषणापासून वंचित राहतो. शरीराचे योग्य पोषण न झाल्याने प्रतिकारशक्ती कमी होते. चहा अती उकळलेला असल्यास तो आतड्यांसाठी आणि पोटातील इतर अवयवांसाठी चांगला नसतो. चहामधील कॅफेन रिकाम्या पोटासाठी घातक असते. त्यामुळे शक्यतो रिकाम्या पोटी चहा घेणे टाळावे. रिकाम्या पोटी चहा घेण्याची वेळ आलीच तर त्यासोबत बिस्कीट, टोस्ट, इत्यादी पदार्थ खावे. त्यामुळे त्रास कमी होतो. अन्यथा पोटात किंवा श्वसन नलिकेत जळजळ होणे, उलटी येणे, जीव घाबरणे अशा समस्या उद्भवतात. येथे देण्यात आलेली माहिती गृहीतके आणि सामान्य माहितीवर आधारित आहे. अधिक माहितीकरिता तज्ज्ञांचा सल्ला घ्यावा.