Photos : ‘या’ सामान्य सवयी ठरतात स्ट्रोकचा धोका वाढण्याचे मोठे कारण; आजच करा बदल

अनेक अहवलांमध्ये दिलेल्या माहितीनुसार, भारतात दर मिनिटाला एका व्यक्तीचा स्ट्रोकमुळे मृत्यू होतो. खराब जीवनशैली आणि काही वाईट सवयींमुळे ही समस्या उद्भवू शकते. स्ट्रोक म्हणजेच पक्षाघात ही आज एक सामान्य समस्या बनली आहे. मोठ्या संख्येने तरुण याच्या विळख्यात येत आहेत. वैद्यकीय भाषेत, जेव्हा मेंदूला रक्तपुरवठा खंडित होतो, तेव्हा ऑक्सिजनची कमतरता निर्माण होते. या स्थितीत मेंदूचे नुकसान किंवा पक्षाघाताचा धोका असतो. आज आपण स्ट्रोकचा धोका वाढण्यासाठी कारणीभूत ठरणाऱ्या वाईट जीवनशैलीच्या सवयींबद्दल जाणून घेऊया. चुकीचे खानपान किंवा आहारातील पोषक तत्त्वांची कमतरता यांचा परिणाम शरीरावर अनेक प्रकारे दिसून येतो, त्यापैकी एक म्हणजे पक्षाघाताची घटना. सॅच्युरेटेड फॅट, मीठ, ट्रान्स फॅट आणि उच्च कोलेस्ट्रॉलचे प्रमाण यामुळे शरीरातील रक्तप्रवाह व्यवस्थेत अडथळा निर्माण होतो. अशा परिस्थितीत आहाराची विशेष काळजी घेणे गरजेचे आहे. मद्यपान हे एक असे व्यसन आहे जे व्यक्तीला हळूहळू मृत्यूच्या दाढेत ढकलू शकते. अतिप्रमाणात केलेल्या मद्यपानामुळे शरीरातील अनेक महत्त्वाच्या अवयवांचे नुकसान होते. तसेच, यामुळे पक्षाघाताचा धोकाही कायम राहतो. शारीरिक क्रियाशील नसल्यामुळे शरीर अनेक गंभीर आजारांचे घर बनू शकते. त्यामुळेच नियमित व्यायाम न करणाऱ्यांनी व्यायाम करण्याची सवय लावून स्वतःला फिट ठेवावे. भारतात तंबाखूशी संबंधित वस्तूंचे उत्पादन आणि सेवन मोठ्या प्रमाणावर केले जाते. तंबाखू हे केवळ पक्षाघाताचेच नाही तर कर्करोगाचेही प्रमुख कारण आहे. तंबाखूमुळे रक्तवाहिन्यांचे नुकसान होते आणि अशावेळी शरीरात रक्तदाबाची समस्या वाढते. येथे देण्यात आलेली माहिती गृहीतके आणि सामान्य माहितीवर आधारित आहे. अधिक माहितीकरिता कृपया तज्ज्ञांचा सल्ला घ्यावा. (सर्व फोटो : Pexels/Freepik)