Summer Health Tips: उन्हाळयासाठी आरोग्यवर्धक पेय हवंय? मग ताक पिण्याचे ‘हे’ फायदे नक्की वाचा

उन्हाळा सुरु झाला असून सगळेच उन्हामुळे त्रस्त झालेत. अशावेळी पोटाला गारवा म्हणून शीतपेयांचा आधार आपण घेतो. शीतपेयांमुळे मिळणारा थंडावा हा तात्पुरता असून त्यांचे अति प्रमाणातील सेवन हे आरोग्यासाठी घटक ठरू शकते. अशावेळी काहीतरी आरोग्यदायी पेय पिणं आवश्यक असून ताक हा यावर उत्तम पर्याय आहे. ताक अगदी सोपं आणि घरी पटकन बनवता येणारं पेय असून त्याचे अनेक फायदे आहेत. आयुर्वेदानुसार ताकामध्ये बऱ्याच आजारांवर उपयुक्त असे गुणधर्म आहेत. ताक हे कॅल्शियम, पोटॅशियम, आणि व्हिटॅमिन बी१२ ने परिपूर्ण आहे. रोजच्या जेवणातील तिखट आणि तेलकट पदार्थांमुळे जळजळ वाढते आणि अशावेळी ताकातील लॅक्टिक ऍसिडमुळे जळजळ कमी होण्यास मदत होऊ शकते. ताक कॅल्शिअमचा उत्तम स्रोत असून त्याच्या आहारातील समावेशाने हाडे आणि दात मजबूत होतात. ताकामुळे रोगप्रतिकारशक्ती वाढते. तज्ज्ञांच्या म्हणण्यानुसार ताकामुळे रक्तदाब नियंत्रित राहू शकतो. उच्च रक्तदाब नियंत्रित झाल्याने हृदयविकार आणि अति तणावासारख्या आजारांचा धोका कमी होऊ शकतो. येथे देण्यात आलेली माहिती गृहीतके आणि सामान्य माहितीवर आधारित आहे. (Photos: Freepik)