PHOTOS: शरद पवारांच्या स्वागतासाठी तब्बल चार क्विंटल फुलांचा हार; कार्यकर्त्यांची तुफान गर्दी, पण पक्ष प्रमुखांनाच धक्काबुक्की

राष्ट्रवादी काँग्रेसचे अध्यक्ष शरद पवार सध्या दोन दिन दिवसांच्या जळगाव दौऱ्यावर आहेत. शरद पवार येणार असल्याने सकाळपासून कार्यकर्त्यांची स्वागतासाठी जोरदार तयारी सुरु होती. शरद पवारांच्या घरावर झालेल्या हल्ल्यानंतर नागपूर, अमरावतीत त्यांचं जंगी स्वागत करण्यात आलं होतं. त्यानंतर जळगावमध्येही स्वागताची तयारी सुरु होती. शुक्रवारी सकाळी शरद पवार जळगावमध्ये पोहोचले असता त्यांचं जंगी स्वागत करण्यात आलं. शरद पवारांचं पक्षाच्या जिल्हा कार्यालयाजवळ जल्लोषात व जंगी स्वागत करण्यासाठी कार्यकर्त्यांनी तुफान गर्दी केली होती. ढोल-ताशांच्या गजर, गुलाबाच्या पाकळ्यांची उधळण आणि जोरदार घोषणाबाजीत शरद पवार यांचे स्वागत करण्यात आले. शरद पवारांच्या स्वागतासाठी युवक काँग्रेसने चार क्विंटल फुलांचा हार तयार केला होता. हा हार उचलण्यासाठी चक्क क्रेन बोलवण्यात आली होती. शरद पवार पोहोचल्यानंतर कार्यकर्त्यांची तुफान गर्दी झाली होती. शरद पवार आल्यानंतर गाडीतून खाली उतरले आणि हार स्वीकारण्यासाठी पोहोचले होते. यावेळी त्यांच्यासोबत पक्षाचे प्रदेशाध्यक्ष जयंत पाटीलदेखील होते. कार्यकर्त्यांची तुफान गर्दी असल्याने अंगरक्षक त्यांना आवरण्याचा प्रयत्न करत होते. मात्र यावेळी अतीउत्साही कार्यकर्त्यांकडून शरद पवारांना धक्का लागल्याने सुरक्षारक्षकांनी त्यांना मागे ढकललं. यानंतर शरद पवारही जास्त वेळ थांबले नाहीत आणि कारमध्ये बसून पुढच्या प्रवासाला निघून गेले.