Maharashtra Political Crisis: शिवसेनेचे नवे गटनेते अजय चौधरी आहेत तरी कोण?

शिवसेनेचे नेते एकनाथ शिंदे यांनी पक्षाविरोधात कथित बंड पुकारल्यानंतर पक्षप्रमुख आणि मुख्यमंत्री उद्धव ठाकरेंनी त्यांना शिवसेनेच्या विधीमंडळ गटनेतेपदावरुन बडतर्फ केलं आहे. एकनाथ शिदेंनी कथित बंड पुकारल्यानंतर शिवसेनेनं घेतला हा सर्वात मोठा निर्णय आहे. अजय चौधरी यांच्याकडे शिवसेनेच्या गटनेते पदाची जबाबदारी सोपवण्यात आली आहे. विधानसभेमधील पक्षाचा गटनेता हा विधानसभेच्या पटलावर पक्षाच्या प्रतिनिधिंकडून कोणते विषय मांडायचे, कोणाला बोलण्याची संधी द्यायची, पक्षाची भूमिका काय आहे हे निश्चित करणे यासारखी महत्वाची जबाबदारी पार पाडतो. एकनाथ शिंदे यांच्याकडे २०१९ पासून हे पद होतं. गटनेता हा विधानसभेमधील आमदारांचा कामकाजादरम्यानचा मुख्य दुवा आणि नेता असतो. मातोश्रीवर शिवसेनेच्या आमदारांसोबत झालेल्या बैठकीनंतर उद्धव ठाकरेंनी या पदावरुन एकनाथ शिंदेंना हटवण्याचा निर्णय घेतला आहे. आता एकनाथ शिदेंऐवजी ही जबाबदारी शिवसेनेचे शिवडी विधानसभा मतदारसंघाचे आमदार अजय चौधरी यांच्याकडे सोपवण्यात आली आहे. शिवडी विधानसभा मतदारसंघ हा शिवसेनेचा बालेकिल्ला म्हणून ओळखला जातो. अजय चौधरी हे शिवसेना विभाग प्रमुख होते. २००९ चा अपवाद वगळता ८० च्या दशकापासून या मतदारसंघावर शिवसेनेचे वर्चस्व आहे. २०१४ विधानसभा निवडणुकीत अजय चौधरी विजयी झाले. २०१९ साली शिवसेनेने शिवडी विधानसभा मतदारसंघातून विद्यमान आमदार अजय चौधरी यांना पुन्हा उमेदवारी दिली होती. २०१९ च्या विधानसभा निवडणुकीत अजय चौधरी ४० हजार मताधिक्क्याने विजयी झाले. शिवडीमध्ये सर्वच्या सर्व नगरसेवक शिवसेनेचे आहेत. शाखाप्रमुखापासून ते गटप्रमुखापर्यंत शिवसेनेचे नेटवर्क भक्कम आहे. लालबाग-परळच्या जनतेने नेहमीच शिवसेनेला साथ दिली आहे. (सर्व फोटो सौजन्य : अजय चौधरी / ट्विटर)