Photos : सैनिकी शिक्षण, वकिली ते राज्यपाल…उपराष्ट्रपतीपदासाठी भाजपाकडून उमेदवारी देण्यात आलेल्या जगदीप धनकड यांच्याबद्दल जाणून घ्या

आज (१८ जुलै) राष्ट्रपतीपदासाठी निवडणूक आहे. ६ ऑगस्टला होणाऱ्या उपराष्ट्रपतीपदाच्या निवडणुकीकडेही सगळ्यांचं लक्ष लागलं आहे. भाजपाकडून उपराष्ट्रपतीपदाच्या निवडणुकीसाठी जगदीप धनकड यांना उमेदवारी देण्यात आली आहे. जगदीप धनकड हे सध्या पश्चिम बंगालचे राज्यपाल आहेत. त्यांचा जन्म १८ मे १९५१ रोजी राजस्थानमधील झुंझूनू जिल्ह्यात झाला. चित्तोडगड येथील सैनिकी शाळेत प्राथमिक शिक्षण पूर्ण केल्यानंतर त्यांनी जयपूरमधून भौतिकशास्त्रात पदवीपर्यंतचे शिक्षण घेतले. धनकड हे पेशाने वकील असून राजस्थानच्या उच्च आणि सर्वोच्च न्यायालयात त्यांनी काम केले आहे. १९८९ मध्ये त्यांनी राजकारणात प्रवेश केला. १९८९ ते १९९१ या काळात जनता दल पक्षाकडून झुंझूनू मतदारसंघातून ते खासदार म्हणून निवडूण गेले होते. १९९३-९८ या काळात धनकड राजस्थान विधानसभेचे अध्यक्ष होते. धनकड यांनी काही काळ काँग्रेसमध्येही काम केले आहे. त्यानंतर कॉग्रेसला सोडचिठ्ठी देत २००३ साली त्यांनी भाजपामध्ये प्रवेश केला. २०१९ साली त्यांना पश्चिम बंगालच्या राज्यपालपदी नियुक्त करण्यात आले. देशाच्या १६व्या उपराष्ट्रपतीपदाच्या निवडणूकीसाठी भाजपाकडून धनकड यांना उमेदवारी दिल्यामुळे याचे वेगवेगळे राजकीय अर्थ लावले जात आहेत. (सर्व फोटो : इंडियन एक्सप्रेस, जगदीप धनकड/ट्विटर ) (हेही पाहा : देशाला मिळणार पहिल्या आदिवासी महिला राष्ट्रपती?; जाणून घ्या द्रौपदी मुर्मू यांच्याबद्दल)