Photos : स्मिता ठाकरेंनंतर आणखी एक ठाकरे एकनाथ शिंदेंच्या निवासस्थानी पोहोचल्याने चर्चा

करोना महामारीनंतर तब्बल दोन वर्षांनंतर राज्यातील गणेशोत्सव कोणत्याही निर्बंधांविना मोठ्या धुमधडाक्यात साजरा होताना दिसत आहे. अनेक राजकीय नेतेही सार्वजनिक गणपती मंडळ, कार्यकर्ते आणि मित्र परिवाराच्या घरी जाऊन गणरायाचे दर्शन घेत आहेत. मुख्यमंत्री एकनाथ शिंदे यांच्या शासकीय ‘वर्षा’ या निवासस्थानीही अनेक राजकीय मंडळींनी बाप्पाचे दर्शन घेण्यासाठी हजेरी लावली. केंद्रीय गृहमंत्री अमित शहा, मनसे अध्यक्ष राज ठाकरे यांनी मुख्यमंत्री शिंदेंच्या घरी जाऊन गणरायाचे दर्शन घेतले. बाळासाहेब ठाकरे यांच्या स्नुषा स्मिता ठाकरे यांनीही वर्षा बंगल्यावर जाऊन बाप्पाचे दर्शन घेतले. त्यानंतर आता ठाकरे घराण्यातील सुपुत्र निहार ठाकरेही बाप्पाच्या दर्शनासाठी वर्षा बंगल्यावर पोहोचले. त्यांच्यासमवेत पत्नी अंकिता पाटील, निहार ठाकरे यांचे सासरे आणि भाजपा नेते हर्षवर्धन पाटील हेदेखील उपस्थित होते. भाविकांचे श्रद्धास्थान आणि नवसाला पावणारा अशी ख्याती असलेल्या ‘लालबागचा राजा’च्या दर्शनासाठीही नेतेमंडळींनी हजेरी लावली. निहार ठाकरे यांनीही लालबागचा राजाचे दर्शन घेतले. 'लालबागचा राजा' चरणी निहार ठाकरे पत्नीसह नतमस्तक झाले. स्मिता ठाकरेंनंतर निहार ठाकरे दर्शनासाठी मुख्यमंत्री एकनाथ शिंदेंच्या निवासस्थानी गेल्याने चर्चा रंगू लागल्या आहेत. (सर्व फोटो : निहार ठाकरे, हर्षवर्धन पाटील/ इन्स्टाग्राम) (हेही पाहा : ‘लालबागचा राजा’च्या चरणी कोट्यवधींचे दान; पहिल्या पाच दिवसांत देणगी स्वरुपात मिळाली ‘इतकी’ रक्कम)