Photos : सोनिया गांधींच्या हस्ते काँग्रेसच्या नव्या मुख्यालयाचे उद्घाटन, दिल्लीतील या कार्यालयाचं नाव काय?

काँग्रेस संसदीय पक्षाच्या प्रमुख सोनिया गांधी यांनी बुधवारी (१५ जानेवारी) नवी दिल्लीतील ९ए, कोटला रोड येथे पक्षाच्या नवीन राष्ट्रीय मुख्यालयाचे उद्घाटन केले. या सोहळ्यासाठी काँग्रेस अध्यक्ष मल्लिकार्जुन खरगे आणि लोकसभेतील विरोधी पक्षनेते राहुल गांधी हे त्यांच्यासोबत होते. कार्यक्रमाची सुरुवात पक्षाच्या नेत्यांनी काँग्रेसचा झेंडा फडकावून आणि 'वंदे मातरम'चा जयघोष करुन केली. नवीन मुख्यालयाला "इंदिरा गांधी भवन" असे नाव देण्यात आले आहे. या कार्यालयाचे काम गेल्या पंधरा वर्षांपासून सुरु होते. या इमारतीची पायाभरणी डिसेंबर २००९ मध्ये तत्कालीन पंतप्रधान मनमोहन सिंग आणि काँग्रेस अध्यक्षा सोनिया गांधी यांनी केली होती. उद्घाटन समारंभाला संपूर्ण भारतातून ४०० प्रमुख काँग्रेस नेते उपस्थित होते. यामध्ये काँग्रेस कार्यकारिणीचे सदस्य, स्थायी आणि विशेष निमंत्रित आणि राज्य शाखांमधील विविध पक्षांचे नेते यांचा समावेश होता. या कार्यक्रमाला PCC अध्यक्ष, काँग्रेस विधिमंडळ पक्षाचे नेते आणि लोकसभा आणि राज्यसभेतील खासदारही उपस्थित होते. यावेळी सर्व मान्यवरांनी त्यांचे मनोगत व्यक्त केले. (सर्व फोटो साभार- राहुल गांधी सोशल मीडिया) हेही पाहा- Saif Ali Khan : राजवाडा, बंगले, कोट्यवधींच्या गाड्या अन् बरचं काही; छोटा नवाब सैफ अली खानची संपत्ती किती?