अर्जुन तेंडुलकरसाठी गुजरात टायटन्सनेही लावलेली बोली, पण…; मुंबई इंडियन्सकडून सचिनच्या लेकाला किती मानधन मिळतं?

मास्टर ब्लास्टर सचिन तेंडुलकरचा मुलगा अर्जुन तेंडुलकर त्याच्या आयपीएलमधील कामगिरीमुळे चर्चेत आहे. अर्जुन तेंडुलकरने रविवारी(१६ एप्रिल) कोलकाता नाईट रायडर्स विरुद्धच्या सामन्यातून आयपीएलमध्ये पदार्पण केलं. दोन वर्ष मुंबई इंडियन्सच्या डगआऊटमध्ये बसून असलेल्या अर्जुन तेंडुलकरला पहिल्यांदाच मुंबई इंडियन्सच्या अंतिम ११ जणांच्या संघात स्थान मिळालं. या सामन्यात त्याने पहिल्याच षटकात गोलंदाजी करत केवळ चार धाव्या दिल्या. मुंबई इंडियन्सविरुद्ध सनरायझर्स हैदराबाद या मंगळावारी (१८ एप्रिल) झालेल्या सामन्यात अर्जुनला पहिली विकेट मिळाली. अर्जुनने सनरायझर्स हैदराबादच्या भुवनेश्वर कुमारला झेलबाद केलं. या सामन्यात त्याने २.५ षटकांत १८ धाव्या दिल्या. अर्जुनला पहिली विकेट मिळाल्यानंतर सचिन तेंडुलकर व सारा तेंडुलकरचा आनंद गगनात मावेनासा झाला. साराने इन्स्टाग्रामवर अर्जुनसाठी खास पोस्ट शेअर करत “या दिवसासाठी खूप वेळ वाट पाहिली. मला तुझा खूप अभिमान वाटतो,” असं म्हटलं. तर सचिन तेंडुलकरने "अखेर तेंडुलकरकडे आयपीएल विकेट आहे," असं ट्वीट केलं होतं. मुंबई इंडियन्सकडून खेळणाऱ्या अर्जुन तेंडुलकरची आयपीएल सॅलरी जाणून घेऊया. अर्जुन तेंडुलकरला २०२१ मध्ये मुंबई इंडियन्सने २० लाख रुपये या रकमेवर खरेदी केलं होतं. २०२२ मध्ये झालेल्या मेगा ऑक्शनमध्ये गुजरात टायटन्सने अर्जुनवर २५ लाखांची बोली लावली होती. त्यानंतर मुंबई इंडियन्सने त्याला २०२३मधील आयपीएलसाठी ३० लाख रुपये इतक्या किंमतीत पुन्हा खरेदी (रिटेन) केलं. (सर्व फोटो : अर्जुन तेंडुलकर/ इन्स्टाग्राम)