Photos: गुजरातमध्ये पुराचा हाहाकार! अहमदाबादसह अनेक शहरं पाण्याखाली; शाळा-कॉलेज बंद, पूरग्रस्त भागात बचावकार्य सुरू

गुजरातमध्ये मुसळधार पावसाने हाहाकार माजवला आहे. राज्यातील अहमदाबाद, वलसाड, नडियादसह अनेक मोठ्या शहरांमध्ये मुसळधार पावसामुळे पाणी साचलंय. खेडा जिल्ह्यात पावसामुळे घरं पाण्याखाली गेली आहेत. अनेक शहरांमध्ये रस्ते पाण्याखाली गेल्याने नागरिक घरात अडकून पडले आहेत. वलसाडमध्ये पूरपरिस्थिती निर्माण झाली आहे. राज्यातील ३८८ रोड पावसामुळे बंद झाले आहेत. छोटा उदयपूर जिल्ह्यालाही मुसळधार पावसाने झोडपून काढले. इथे पावसामुळे नदीचा प्रवाह वाढला. त्यामुळे पूल वाहून गेला तसेच पुलाच्या रेलिंगचंही मोठं नुकसान झालंय. अनेक गावांचा शेजारच्या गावांशी संपर्क तुटला आहे. छोटा उदयपूर जिल्ह्यात पावसामुळे पाण्याचा प्रवाह वाढून रस्ता वाहून गेला. नडियाद शहरालाही या मुसळधार पावसाचा फटका बसला. शहरातील मुख्य रस्त्यांवर पाणी साचलंय. राज्यभरात पुरात अडकलेल्या तीन हजार नागरिकांना एसडीआरएफ आणि एनडीआरएफने आतापर्यंत सुरक्षित स्थळी हलवलं आहे. छोटा उदेपूर, डांग, नर्मदा, वलसाड, नवसारी आणि पंचमहाल या सहा जिल्ह्यांत रविवारी सकाळी ८ ते सायंकाळी ६ या वेळेत पाच इंच पावसाची नोंद झाली. एनडीआरएफच्या सहाव्या बटालियनने एक निवेदन जारी करत त्यांची टीम १२ जिल्ह्यांमध्ये तैनात करण्यात आली आहे, अशी माहिती दिली. नवसारी, गीर सोमनाथ, सुरत, राजकोट, बनासकांठा, वलसाड, भावनगर, कच्छ, जामनगर, अमरेली, द्वारका आणि जुनागढ या जिल्ह्यांना पावसाचा मोठा फटका बसलाय. “गुजरातमध्ये पुढील दोन दिवस मुसळधार पावसाच्या अंदाजाच्या पार्श्वभूमीवर मुख्यमंत्र्यांनी सर्व सहा जिल्ह्यांच्या जिल्हाधिकाऱ्यांना सतर्क राहण्यास सांगितले आहे. वलसाडमध्ये पुरात अडकलेल्या नागरिकांना बाहेर काढण्यात आलं. अहमदाबादमध्ये रस्त्यांवर कंबरेपर्यंत पाणी साचल्याने नागरिकांना अडचणींचा सामना करावा लागतोय. पुढचे तीन दिवस राज्यात मुसळधार पावसाचा अंदाज वर्तवण्यात आला आहे. त्यामुळे पूरग्रस्त भागातील शाळा कॉलेज बंद ठेवण्यात आले आहेत. (सर्व फोटो एएनआय आणि पीटीआयवरून साभार)