Sonali Phogat : टिकटॉक स्टार, बिग बॉस स्पर्धक ते भाजपा नेत्या…सोनाली फोगट यांचा थक्क करणारा प्रवास

प्रसिद्ध टिकटॉक स्टार आणि भाजपा नेत्या सोनाली फोगट यांचं आज (२३ ऑगस्ट) निधन झालं आहे. हृदयविकाराचा झटका आल्याने गोव्यात वयाच्या ४२व्या वर्षी त्यांची प्राणज्योत मालवली. सोनाली या सोशल मीडियावर प्रचंड सक्रिय होत्या. त्यांचे लाखो चाहते आहेत. निधनाच्या वृत्तामुळे त्यांच्या चाहत्यांना धक्का बसला आहे. सोनाली फोगट यांचा जन्म २१ सप्टेंबर १९७९ रोजी हरियाणातील फतेहाबाद येथे झाला. त्यांनी पदवीपर्यंत शिक्षण घेतले होते. २००६ साली त्यांनी हिसार दूरदर्शनसाठी निवेदन करत करिअरला सुरुवात केली. टिकटॉक या सोशल मीडिया अॅपमुळे त्या प्रसिद्धीझोतात आल्या. त्यांचे टिकटॉकवर १.२० लाख फॉलोवर्स होते. त्यांचे अनेक व्हिडीओ सोशल मीडियावर चर्चेत असायचे. सोनाली या उत्तम अभिनेत्री होत्या. यांनी अनेक पंजाबी चित्रपटांत काम करून प्रेक्षकांचे मनोरंजन केले. छोट्या पडद्यावरील ‘बिग बॉस हिंदी’च्या १४व्या पर्वातही त्या सहभागी झाल्या होत्या. २००८ साली सोनाली यांना भाजपाचे सदस्यत्व मिळाले होते. त्यांची प्रसिद्धी पाहून २०१९मध्ये हरियाणा विधानसभा निवडणुकीसाठी त्यांना भाजपाकडून तिकीट देण्यात आले होते. हरियाणातील हिस्सार जिल्ह्यातील आदमपूर विधानसभा मतदारसंघातून त्यांनी निवडणूक लढवली होती. परंतु, त्यांचा पराभव झाला होता. त्यानंतर भाजपाने हरियाणातील महिला मोर्चाच्या प्रदेश उपाध्यक्षपदी त्यांची नियुक्ती केली होती. सोनाली यांचे पती संजय फोगट यांचा २०१६ मध्ये संशयास्पदरित्या मृत्यू झाला होता. सोनाली यांना एक मुलगी असून यशोधरा असे तिचे नाव आहे.(सर्व फोटो : सोनाली फोगट/ इन्स्टाग्राम)