तुमच्या आवडत्या बिस्किटांना लहान छिद्र का असतात माहितीये का? कारण जाणून व्हाल थक्क

प्रत्येकाच्या घरी बिस्कीट सहज उपलब्ध असते. बिस्किट खाणं कुणालाही आवडतं. सकाळची सुरुवात दुधाचा चहा आणि बिस्किटांनी करणारे अनेक जण आहेत. लहान मुलांसाठी तर बिस्किट जेवणच असतं. सकाळ असो वा संध्याकाळ, दिवस असो वा रात्र, लोकांना बिस्किटं खायला खूप आवडतं. बाजारात बिस्किटांचे अनेक प्रकार उपलब्ध आहेत. या बिस्किटांचं डिझाइनसुद्धा वेगवेगळं असतं. तुम्ही बाजारात उपलब्ध असलेल्या अनेक बिस्किटांना लहान छिद्र असल्याचे पाहिले असेल, हे छिद्र कमीअधीक प्रमाणात असतात. पण तुम्ही कधी विचार केला आहे का बिस्किटांमध्ये असे लहान छिद्र का असतात? बहुतेक लोकांना वाटते की, बिस्किटांना आकर्षक बनविण्यासाठी छिद्रे केली असणार. खरंतर ही कोणती डिझाईन नाही तर यामागे वैज्ञानिक कारण दडलेलं आहे. हे कारण नेमकं कोणते ते जाणून घेऊया.. खरेतर बिस्किटांना असलेल्या छिद्रांना 'डाकर्स' म्हणतात. बिस्किट भाजले जात असताना त्यात हवा भरली जाते. त्यामुळे बिस्किटांचा आकार खराब होण्याची शक्यता असते. बिस्किटांमधून ही हवा बाहेर पडावी म्हणून बिस्किटांना लहान छिद्र केली जातात. कारण छिद्र नसतील तर पिठाच्या आत हवा तशीच राहते. त्यामुळे ओव्हनमध्ये बिस्किटं बनवत असताना ती फुगतात, व त्यांचा आकार वाढू लागतो. आकार वाढू नये, म्हणून छिद्र केली जातात. बिस्किटे बनवण्यासाठी कारखान्यांमध्ये इतकी हायटेक मशिन्स वापरली जातात की त्या बिस्किटांना समान अंतरावर छिद्र पाडतात. म्हणून ते डिझाइन सारखं वाटतात. (फोटो सौजन्य : freepik)