पिंपरी : गणेश विसर्जन मिरवणुकीत ध्वनिक्षेपकांचा दणदणाट करणे, ‘प्रकाशझोतांचा’ (लेझर बीम) वापर करणे पिंपरी-चिंचवडमधील गणेश मंडळांना भोवले आहे. कर्णकर्कश्श आवाज करून ध्वनिप्रदूषण केल्याप्रकरणी ४० गणेश मंडळांवर गुन्हे दाखल केले आहेत. त्याचबरोबर ध्वनिक्षेपकांचा मालक आणि वाहनचालक, मालकांवरही गुन्हे दाखल केले आहेत.

गणेश विसर्जन मिरवणुकीत प्रकाशझोतांचा वापर करू नका, ध्वनिक्षेपकांच्या आवाजाची पातळी निर्धारित क्षमतेपेक्षा जास्त नसावी, अशा सूचना पोलिसांनी दिल्या होत्या. मात्र, त्याकडे मंडळांनी दुर्लक्ष केले. त्यामुळे पोलिसांनी नियमांचे उल्लंघन करणाऱ्या मंडळांवर गुन्हे दाखल केले आहेत. पिंपरी-चिंचवड पोलीस आयुक्तालयाच्या हद्दीतील सर्वच भागातील गणेश मंडळांनी ध्वनिक्षेपकांचा दणदणाट केला. डोळ्यांसाठी घातक असलेल्या ‘प्रकाशझोतांचा’वापर केला.

पोलिसांच्या तपासणीत ध्वनिक्षेपकांच्या आवाजाची पातळी मर्यादेपेक्षा अधिक असल्याने ध्वनिप्रदूषण केल्याप्रकरणी मंडळाचे अध्यक्ष, ध्वनिक्षेपकांचे चालक, मालक आणि ट्रॅक्टर मालकाविरोधात गुन्हा दाखल करण्यात आला आहे. सार्वजनिक ठिकाणी कर्णकर्कश्श आवाजात ध्वनिक्षेपक वाजवल्याने ही कारवाई करण्यात आली आहे. त्यामध्ये ४० मंडळांवर भारतीय न्याय संहिता कलम २२३ प्रमाणे गुन्हे दाखल करण्यात आले आहेत. त्यात वाकड ठाण्यात १७, पिंपरीत आठ, निगडीत पाच, सांगवीत पाच, दापोडीत तीन आणि तळेगाव दाभाडे येथे पोलीस ठाण्यात दोन मंडळांवर गुन्हे दाखल करण्यात आले आहेत.

हेही वाचा

विनापरवाना मिरवणूक काढल्याप्रकरणी गुन्हा

सांगवी पोलीस ठाण्याच्या हद्दीत पिंपळे सौदागर येथे पूर्वपरवानगी न घेता मिरवणूक काढून मिरवणुकीमध्ये ध्वनिक्षेपक मोठ्या आवाजात लावल्याप्रकरणी एका व्यक्तीविरोधात गुन्हा दाखल करण्यात आला आहे. कोणतीही पूर्वपरवानगी न घेता गणपती विसर्जन मिरवणूक काढली. सार्वजनिक रस्त्यावर ध्वनिक्षेपक मोठ्या आवाजात लावला. यामुळे सार्वजनिक शांततेचा भंग झाल्याचे फिर्यादीत म्हटले आहे.

‘नॉईज लेवल मीटर’ या उपकरणाद्वारे आयुक्तालय हद्दीत ठिकठिकाणी ध्वनीच्या पातळीची मोजणी करण्यात आली. आवाजाच्या मर्यादेचे उल्लंघन आणि प्रकाशझोतांचा वापर करणाऱ्या गणेश मंडळावर गुन्हे दाखल केले आहेत. सहायक पोलीस आयुक्तांकडून चौकशी करण्यात येत आहे. त्यानंतर पुढील कायदेशीर कारवाई करण्यात येणार आहे. डॉ. शिवाजी पवार, पोलीस उपायुक्त