बारामती : ‘माळेगाव सहकारी साखर कारखाना निवडणुकीच्या पॅनेलमध्ये सर्वपक्षीय उमेदवारांना संधी दिली जाणार आहे. १३ जून रोजी कारखान्याच्या अध्यक्षपदाच्या उमेदवाराच्या नावाची घोषणा करणार आहे’ असे राज्याचे उपमुख्यमंत्री अजित पवार यांनी सांगितले.
माळेगाव सहकारी साखर कारखान्याच्या निवडणुकीच्या पार्श्वभूमीवर बारामतीत जाहीर मेळाव्याचे आयोजन करण्यात आले होते, त्यावेळी ते बोलत होते.पवार म्हणाले, ‘या कारखान्याच्या पॅनेलमध्ये सर्वपक्षीय उमेदवार उभे केले जाणार आहेत. नवीन चेहऱ्यांना संधी देण्याचा प्रयत्न आहे. ही निवडणूक लोकसभा, विधानसभा, स्थानिक स्वराज्य संस्था यांच्यासारखी नसेल. माझ्या हातात असलेल्या सर्व यंत्रणांचा वापर करणार आहे. कारखाना सर्वोत्तम पद्धतीने चालविण्यासाठी ही निवडणूक लढविण्याचा निर्णय घेतला आहे. १३ जून रोजी कारखान्याच्या अध्यक्षपदाच्या उमेदवाराच्या नावाची घोषणा करणार आहे.’
‘ते हट्टी, तर मी दुप्पट हट्टी’
‘ते हट्टी असतील, तर मीही दुप्पट हट्टी आहे. अनेक वर्षे काम केल्यावर आता नव्या लोकांना काम करू दिले पाहिजे. वयाचा विचार करून नवीन युवकांना संधी द्यायला हवी. काही जण संचालक मंडळाच्या बैठकीलाही फिरकले नाहीत’ अशा शब्दात चंद्रराव तावरे यांचा नामोल्लेख टाळत अजित पवार यांनी टीका केली.