पुणे : स्वारगेट एसटी स्थानकाच्या आवारात प्रवासी तरुणीवर बलात्कार प्रकरणातील आरोपी दत्तात्रय गाडे याचा जामीन अर्ज अतिरिक्त सत्र न्यायाधीश अनिरुद्ध गांधी यांनी फेटाळून लावला. आरोपीने गंभीर स्वरूपाचा गुन्हा केलेला आहे, असे निरीक्षण नोंदवून न्यायालयाने गाडे याचा जामीन अर्ज दुसऱ्यांदा फेटाळून लावला. आरोप निश्चित करण्यासाठी पुढील सुनावणीला गाडे याला न्यायालयात हजर करण्याचे आदेश पोलिसांना देण्यात आले.
स्वारगेट आगारातील शिवशाही बसमध्ये प्रवासी तरुणीवर २५ फेब्रुवारीला सकाळी साडेपाचच्या सुमारास आरोपी दत्तात्रय रामदास गाडे (वय ३७, रा. गुनाट, ता. शिरूर, जि. पुणे) याने बलात्कार केल्याची घटना घडली. या प्रकरणी गाडेविरुद्ध स्वारगेट पोलीस ठाण्यात गुन्हा दाखल करण्यात आला होता. गाडे याच्याविरुद्ध ८९३ पानांचे आरोपपत्र न्यायालयात दाखल करण्यात आले आहे. येरवडा कारागृहात न्यायालयीन कोठडीत असलेल्या गाडेने ॲड. वाजेद खान-बिडकर यांच्यामार्फत जामीन मिळण्यासाठी केलेला पहिला अर्ज सत्र न्यायालयाने ३० जून रोजी फेटाळला. त्यानंतर गाडेने वकिलांमार्फत जामीन मिळवण्यासाठी पुन्हा न्यायालयात अर्ज सादर केला.
‘आरोपीची पत्नी आणि दोन मुले त्याच्यावर अवलंबून आहेत. या प्रकरणाचा तपास पूर्ण झाला आहे. आरोपपत्र दाखल झाले आहे. आरोपीला जामीन द्यावा,’ अशी विनंती ॲड. वाजेद खान-बिडकर यांनी युक्तिवादात केली. ‘आरोपीचा पहिला जामीन अर्ज आरोपपत्र दाखल करण्यापूर्वीच फेटाळला होता. आरोपी सराईत गुन्हेगार आहे, त्याने लैंगिक अत्याचाराचा गंभीर गुन्हा केला आहे. त्याला जामीन मिळाल्यास तो पुन्हा अशा प्रकारचा गुन्हा करू शकतो,’ असा युक्तिवाद विशेष सरकारी वकील अजय मिसार आणि पीडित तरुणीच्या वकील ॲड. श्रीया आवले यांनी केली. गाडे याला जामीन देण्यात येऊ नये, अशी विनंती सरकार पक्षाकडून करण्यात आली. दोन्ही बाजूंचा युक्तिवाद ऐकल्यानंतर न्यायालयाने गाडे याचा जामीन अर्ज फेटाळून लावला.