पिंपरी : राष्ट्रीय विधी सेवा प्राधिकरण, राज्य विधी सेवा प्राधिकरण आणि पुणे जिल्हा विधी सेवा प्राधिकरणद्वारे घेण्यात आलेल्या लोकअदालतीत पिंपरी- चिंचवड महापालिकेच्या पाणीपट्टी आणि मालमत्ता कराची पाच कोटींची थकबाकी वसूल झाली आहे. तीन हजार ४२४ प्रकरणे निकाली निघाली आहेत.
महापालिकेच्या कर आकारणी व कर संकलन विभागामार्फत पाणीपट्टी व मालमत्ता कर थकबाकीदारांना ऑनलाइन नोटिसा पाठवल्या होत्या. लोकअदालतीमध्ये पाणीपट्टी आणि मालमत्ता कराशी संबंधित तीन हजार ४२४ प्रकरणे निकाली निघाली. पाच कोटी १४ लाख १६० रुपयांचा महसूल संकलित झाला आहे. या लोकअदालतीकरिता नोटिसा पाठवलेल्या मालमत्ताधारकांनी थकबाकीसह चालू वर्षाचा मालमत्ता कराचा भरणा केला आहे. तसेच ज्या मालमत्ताधारकांनी ऑनलाइन स्वरूपात मालमत्ता कराचा भरणा केला आहे, त्यांना चालू वर्षाच्या सामान्य करावरील चार टक्के सवलतीचा लाभ मिळाला आहे.
दोन हजार ४८१ पाणीपट्टी थकबाकीदारांकडून तीन कोटी १४ लाख १९ हजार रुपयांची पाणीपट्टी वसूल झाली. ९४३ मालमत्ता कर थकबाकीदारांकडून दोन कोटी २ हजार रुपयांचा मालमत्ता कर संकलित झाला आहे. यामध्ये ८३४ मालमत्ताधारकांनी ऑनलाइन स्वरूपात मालमत्ता कर भरून चार टक्के सवलतीचा लाभ घेतल्याचे सहायक आयुक्त अविनाश शिंदे यांनी सांगितले.
थकबाकीदारांच्या मालमत्तांची जप्ती
लोकअदालतीत मालमत्ता कराची मोठ्या प्रमाणावर थकबाकी वसूल झाली. या पुढेही प्रत्येक थकबाकीदारापर्यंत पोहोचण्यासाठी अधिक प्रभावी मोहिमा राबवणार आहोत. तसेच वारंवार संधी देऊनही थकबाकी न भरणाऱ्या मालमत्ताधारकांच्या मालमत्ता जप्तीची कारवाई करण्यात येणार असल्याचे अतिरिक्त आयुक्त प्रदीप जांभळे-पाटील यांनी सांगितले.