पुणे : शिवाजीनगर न्यायालयाच्या इमारतीवरून उडी मारून ज्येष्ठ नागरिकाने आत्महत्या केल्याची धक्कादायक घटना बुधवारी घडली. १९९७ पासून जमिनीबाबत दीर्घकाळ न्यायालयीन प्रक्रिया सुरू असल्याने नैराश्यातून त्यांनी आत्महत्या केल्याची प्राथमिक माहिती तपासात मिळाली असल्याचे पोलिसांनी सांगितले.
नामदेव यशवंत जाधव (वय ६१, रा. वडकी, हडपसर-सासवड रस्ता) असे आत्महत्या केलेल्या ज्येष्ठाचे नाव आहे. जाधव दिवे घाटाच्या पायथ्याशी असलेल्या वडकी गावात राहायला आहेत. वडकी गावात त्यांची जमीन आहे. १९९७ पासून जाधव यांचा जमिनीवरून एकाशी वाद सुरू होता. संबंधित दावा न्यायप्रविष्ट आहे. दीर्घकाळ न्यायालयीन प्रक्रिया सुरू असल्याने जाधव नैराश्यात होते. नैराश्यातून त्यांनी आत्महत्या केल्याची प्राथमिक माहिती तपासात मिळाली असल्याचे पोलिसांनी सांगितले.
बुधवारी (दि.१५) सकाळी जाधव हे शिवाजीनगर न्यायालयात आले. न्यायालयाच्या नवीन इमारतीच्या चौथ्या मजल्यावरून त्यांनी उडी मारली. या घटनेत ते गंभीर जखमी झाले. या घटनेची माहिती मिळताच शिवाजीनगर पोलीस ठाण्याचे वरिष्ठ पोलीस निरीक्षक महेश बोळकोटगी यांच्यासह पथकाने घटनास्थळी धाव घेतली.
जाधव यांना तातडीने ससून रुग्णालयात उपचारासाठी दाखल करण्यात आले. उपचारांपूर्वीच त्यांचा मृत्यू झाल्याचे डॉक्टरांनी जाहीर केल्याचे पोलिसांनी स्पष्ट केले. शिवाजीनगर पोलिसांनी या घटनेची नोंद केली आहे.