पुणे : शेअर बाजारात गुंतवणुकीच्या आमिषाने ज्येष्ठाची दीड कोटी रुपयांची फसवणूक करण्यात आल्याचा प्रकार उघडकीस आला. या प्रकरणी सायबर चोरट्यांविरुद्ध गुन्हा दाखल करण्यात आला आहे.
याबाबत एका ज्येष्ठ नागरिकाने सायबर पोलीस ठाण्यात फिर्याद दिली आहे. पोलिसांनी दिलेल्या माहितीनुसार, तक्रारदार ज्येष्ठ नागरिक हे वडगाव शेरी भागात राहायला आहेत. पोलिसांनी दिलेल्या माहितीनुसार, तक्रारदार ज्येष्ठ नागरिकाच्या मोबाइल क्रमांकावर सायबर चोरट्यांनी मार्च महिन्यात संपर्क साधला होता. शेअर बाजारात गुंतवणूक केल्यास चांगला परतावा मिळेल, असे आमिष चोरट्यांनी त्यांना दाखविले होते. चोरट्यांनी त्यांना रक्कम गुंतविण्यास सांगितले, तसेच शेअर बाजार व्यवहारासंदर्भातील एका समूहात त्यांना सहभागी करून घेतले.
ज्येष्ठाने रक्कम गुंतविल्यानंतर त्यांना परतावा मिळाला. परतावा मिळाल्याने त्यांचा विश्वास बसला. त्यानंतर चोरट्यांनी त्यांना आणखी रक्कम गुंतविण्यास सांगितले. त्यानंतर चोरट्यांच्या खात्यात ज्येष्ठाने वेळोवेळी एक कोटी ५७ लाख रुपये जमा केले. पैसे गुंतविल्यानंतर चोरट्यांनी त्यांना परतावा दिला नाही. त्यांनी चोरट्यांच्या मोबाइल क्रमांकावर संपर्क साधला. तेव्हा मोबाइल क्रमांक बंद असल्याचे लक्षात आले. फसवणूक झाल्याचे लक्षात आल्यानंतर त्यांनी सायबर पोलीस ठाण्यात तक्रार दिली. वरिष्ठ पोलीस निरीक्षक स्वप्नाली शिंदे तपास करत आहेत.
बँक अधिकारी असल्याच्या बतावणीने फसवणूक
बँक अधिकारी असल्याच्या बतावणीने ज्येष्ठ नागरिकाची पाच लाख ३५ हजार रुपयांची फसवणूक करण्यात आल्याचा प्रकार उघडकीस आला आहे. या प्रकरणी सायबर चोरट्यांविरुद्ध काळेपडळ पोलीस ठाण्यात फिर्याद दिली आहे. तक्रारदार ज्येष्ठ नागरिक पिसोळी भागात राहायला आहेत. चोरट्यांनी त्यांच्या मोबाइल क्रमांकावर संपर्क साधला. बँक अधिकारी असल्याची बतावणी केली. बँकेकडून ऑनलाइन व्यवहारासंदर्भातील सुविधा देण्यात येणार आहे, अशी बतावणी करून चोरट्यांनी त्यांच्या बँक खात्याची गोपनीय माहिती घेतली. या माहितीचा गैरवापर करून चोरट्यांनी त्यांच्या खात्यातून ऑनलाइन पद्धतीने पाच लाख ३५ हजार रुपये काढून घेतले. वरिष्ठ पोलीस निरीक्षक मानसिंग पाटील तपास करत आहेत.