पुणे: हिंजवडीच्या आयटी हबला शिवाजीनगरच्या मध्यवर्ती केंद्राशी जोडणाऱ्या ‘पुणेरी मेट्रो’ प्रकल्पाचे काम वेगाने पुढे सरकत आहे. या मार्गावरील खांब उभारणी आता अंतिम टप्प्यात आली आहे. या २३.३ किलोमीटर मार्गावरील एकूण ९२३ खांबांपैकी ७१५ खांबांची म्हणजेच ८० टक्के उभारणी आता पूर्ण झाली आहे.
गणेशखिंड रस्त्यावर कृषी महाविद्यालय चौकाच्या अलीकडे गुरुवारी या मेट्रोचा ७१५ वा खांब उभा करण्यात आला. विशेष म्हणजे, मागील वर्षी एप्रिल महिन्यात गणेशखिंड रस्त्यावर पहिल्या खांबाचे कास्टिंग केल्यानंतर १७ महिन्यांत ७०० खांब उभारणीचा टप्पा ओलांडण्यात आला आहे.
हेही वाचा… पिंपरी-चिंचवड न्यायालयासाठी बांधली जाणार नवीन इमारत
हिंजवडी ते शिवाजीनगर मार्गावरील पुणे मेट्रो लाईन ३ चे काम पुणे महानगर प्रदेश विकास प्राधिकरण (पीएमआरडीए) तर्फे सार्वजनिक खासगी भागीदारी तत्त्वावर टाटा समूहाने हाती घेतले आहे. त्यासाठी पुणे आयटी सिटी मेट्रो रेल लिमिटेड या कंपनीची स्थापना करण्यात आली आहे.
‘पाईल कॅप’ उभारणीलाही गती
खांब उभारणीच्या जोडीला पुणे मेट्रो लाईन ३ साठीच्या पाईल कॅपचे कामही अंतिम टप्प्यात पोहोचले असून ९२३ पैकी ८१० पाईल कॅपची उभारणी पूर्ण झालेली आहे. या मार्गिकेवरील खांब दोन हजार मिमी व्यासाचे आणि मेट्रो रेल्वे यंत्रणेच्या आरेखन मापदंडांशी सुसंगत असे साकारण्यात येत असल्याचे पुणे मेट्रो लाईन ३ चे मुख्य कार्यकारी अधिकारी आलोक कपूर यांनी सांगितले.