पुणे : आवक वाढल्याने मटारच्या दरात घट झाली. घाऊक बाजारात गेल्या आठवड्याच्या तुलनेत भेंडी, गवार, काकडी, वांगी, भुईमूग शेंग, गाजर, घेवडा या फळभाज्यांच्या दरात १० ते २० टक्क्यांनी वाढ झाली.
गुलटेकडीतील घाऊक बाजारात रविवारी राज्य, तसेच परराज्यातून ८५ ते ९० ट्रक फळभाज्यांची आवक झाली. गेल्या आठवड्याच्या तुलनेत फळभाज्यांची आवक कमी झाली. कर्नाटक, उत्तर प्रदेश, आंध्र प्रदेशातून १४ ते १५ टेम्पो हिरवी मिरची, इंदूर, राजस्थानातून ८ ते १० टेम्पो गाजर, कर्नाटकातून ४ ते ५ टेम्पो कोबी, आंध्र प्रदेश आणि तामिळनाडू येथून ३ ते ४ टेम्पो शेवगा, तामिळनाडूतून २ ते ३ टेम्पो तोतापुरी कैरी, कर्नाटकातून ३ ते ४ टेम्पो घेवडा, ३ ते ४ टेम्पो भुईमूग शेंग, २ टेम्पो पावटा, मध्य प्रदेश, हिमाचल प्रदेशातून ४ ते ५ टेम्पो मटार, मध्य प्रदेशातून ८ ते १० टेम्पो लसूण अशी आवक परराज्यातून झाल्याची माहिती श्री छत्रपती शिवाजी मार्केट यार्डातील ज्येष्ठ अडते विलास भुजबळ यांनी दिली.
पुणे विभागातून ५०० ते ४५० गोणी सातारी आले, भेंडी ५ ते ६ टेम्पो, गवार ३ ते ४ टेम्पो, टोमॅटो ७ ते ८ हजार पेटी, हिरवी मिरची ४ ते ५ टेम्पो, काकडी ७ ते ८ टेम्पो, फ्लॉवर ८ ते १० टेम्पो, गाजर ३ ते ४ टेम्पो, कोबी ५ ते ६ टेम्पो, ढोबळी मिरची ८ ते १० टेम्पो, भुईमूग शेंग ५० ते ६० गोणी, तांबडा भोपळा १० ते १२ टेम्पो, कांदा १०० ट्रक अशी आवक झाली, तसेच इंदूर, आग्रा, स्थानिक भागातून बटाटा ५० ते ५५ टेम्पो अशी आवक झाली.
पालेभाज्यांच्या दरात वाढ
पालेभाज्यांची आवक कमी झाल्याने दरात वाढ झाली आहे. पालेभाज्यांना मागणीही वाढली आहे. मार्केट यार्डातील तरकारी विभागात रविवारी कोथिंबीर एक लाख जुडी, तसेच मेथीच्या ५० हजार जुडींची आवक झाली. पालेभाज्यांचे दर (शेकडा जुडी) – कोथिंबीर – १५०० ते २५००, मेथी – १२०० ते १८००, शेपू – १००० ते १५००, कांदापात – १००० ते २०००, चाकवत – ५०० ते १२००, करडई – ५०० ते १०००, पुदिना – ५०० ते १०००, अंबाडी – ५०० ते १०००, मुळे – १००० ते २०००, राजगिरा – ५०० ते १०००, चुका- ५०० ते १५००, चवळई – ५०० ते १०००, पालक – १५०० ते २५००.
संत्री, कलिंगड, खरबूज, पपईच्या दरात वाढ
मार्केट यार्डातील फळबाजारात संत्री, कलिंगड, खरबूज, सीताफळ, पपईच्या दरात वाढ झाली. लिंबांच्या दरात घट झाली. रविवारी फळबाजारात मोसंबी ८० ते ९० टन, संत्री २५ ते ३० टन, डाळिंब ५० ते ६० टन, पपई १० ते १५ टेम्पो, लिंबे तीन हजार गोणी, कलिंगड ३ ते ४ टेम्पो, खरबूज १ ते २ टेम्पो, चिकू एक हजार खोकी, अननस ८ ट्रक, बोरे २०० ते २५० गोणी, सीताफळ १० ते १५ टन, पेरू ८०० ते ९०० प्लास्टिक जाळी (क्रेटस) अशी आवक झाली.