पिंपरी-चिंचवड : पिंपरी-चिंचवडमध्ये पत्नीवर अनैतिक संबंधाचा संशय घेऊन २९ वर्षीय तरुणाने पत्नीला जीवे मारण्याचा प्रयत्न केला आहे. या घटनेप्रकरणी संत तुकारामनगर पोलिसांनी आरोपी कृष्णा बाबुराव पांचाळला बेड्या ठोकल्या आहेत. लक्ष्मी शेट्टीबा दांडेकर यांनी याबाबत तक्रार दिली आहे.
पोलिसांनी दिलेल्या माहितीनुसार, चिंचवडच्या इंदिरानगर झोपडपट्टीमध्ये आरोपी कृष्णा पांचाळ आणि पत्नी लक्ष्मी कृष्णा पांचाळ यांच्यात कौटुंबिक कारणावरून जोरदार वाद झाले. कृष्णा हा नेहमी मद्यपान करायचा. बुधवारीदेखील किरकोळ कारणावरून त्यांच्यात वाद झाले.
हे वाद शेजाऱ्यांनी मिटवले. परंतु, रात्री अकराच्या सुमारास त्यांच्यात पुन्हा एकदा वाद झाला. लाकडी फळी, वीट, सिमेंटच्या गट्टूने जीवे ठार मारण्याचा उद्देशाने त्याने पत्नीच्या तोंडावर आणि कपाळावर मारहाण केली. “मी आज हिला जिवंत सोडणार नाही,” असे म्हणत लक्ष्मीला बेदम मारहाण करण्यात आली.
लक्ष्मी रक्तबंबाळ अवस्थेत पडली होती. तिला तातडीने रुग्णालयात दाखल करण्यात आलं आहे. पत्नीचे इतर पुरुषांसोबत अनैतिक संबंध असल्याच्या संशयावरून मारहाण केल्याचे आरोपीने पोलिसांना सांगितले आहे. याप्रकरणी पोलिसांनी आरोपी कृष्णाला अटक केली आहे. संत तुकाराम नगर पोलिस ठाण्यात हत्येचा प्रयत्न केल्याप्रकरणी गुन्हा दाखल करण्यात आला आहे.