उल्हासनगर : नवरात्रोत्सवाच्या आनंदमय वातावरणाला मंगळवारी रात्री दहशतीचे ग्रहण लागले. कॅम्प क्र. २ येथील बंजारा विकास परिषदेच्या परिसरात सुरू असलेल्या गरब्यादरम्यान, एका सराईत गुन्हेगाराने शिवसेना शाखाप्रमुखावर थेट बंदूक रोखत हवेत गोळीबार केला. या घटनेमुळे परिसरात भीतीचे वातावरण निर्माण झाले असून पोलिसांनी तातडीने कारवाई करत आरोपी सोहम पवार (१९) व त्याचे वडील अनिल पवार या दोघांना अटक करून पिस्तुल जप्त केले आहे.
घटनेवेळी बालाजी मित्र मंडळ व शिवसेना शाखाप्रमुख बाळा भगुरे यांच्या पुढाकाराने गरब्याचे आयोजन करण्यात आले होते. रात्री साडे अकरा वाजण्याच्या सुमारास सोहम पवार कार्यक्रमस्थळी दाखल झाला. “मी इकडचा भाई आहे, परवानगी घेतली का माझ्याकडून?” अशी धमकी देत त्याने बाळा भगुरे यांच्यावर थेट बंदूक रोखली. अचानक घडलेल्या या प्रकाराने नागरिकांमध्ये भीतीचे वातावरण निर्माण झाले. भगुरे यांच्या भावाने प्रसंगावधान राखत मध्यस्थी करण्याचा प्रयत्न केला, परंतु संतप्त सोहमने हवेत दोन गोळ्या झाडून दहशत माजवली. यावेळी त्याचे वडील अनिल पवार यांनीही साथ देत गोंधळ घालण्याचा प्रयत्न केला.
गोळीबाराचा आवाज होताच परिसरात एकच गोंधळ उडाला. महिलांपासून तरुणांपर्यंत सर्व उपस्थितांनी पळापळ सुरू केली. काही क्षणांतच सणाचा उत्सव गोंधळात बदलला. घटनेची माहिती मिळताच वरिष्ठ पोलिस निरीक्षक संतोष आव्हाड घटनास्थळी धाव घेऊन पाहणी केली. बाळा भगुरे यांच्या फिर्यादीवरून गुन्हा दाखल करण्यात आला असून, बुधवारी सकाळी कॅम्प क्र. ४ मधून सोहम व त्याचे वडील अनिल पवार यांना अटक करून पिस्तुल जप्त करण्यात आल्याची माहिती पोलिस उपायुक्त सचिन गोरे यांनी दिली.
तर या प्रकारानंतर शहरात ऐन सण उत्सवांच्या काळात दहशतीचे वातावरण निर्माण झाले आहे. पिस्तुलांचा सर्रास वापरा दहशत माजवण्याचे प्रकार अजूनही रोखण्यात पोलिसांना यश आलेले नाही. यापूर्वीही असे दहशत माजवण्याचे पार घडले होते. विनयभंगाचा एक आरोपी जामिनावर सुटल्यानंतर त्याने ज्या मुलींचा विनयभंग केला होता त्यांच्या घराबाहेर जाऊन आनंद उत्सव साजरा केला होता. त्यावरून पोलिसांवर मोठी टीका झाली होती. त्यानंतर पोलिसांनी कारवाई सुद्धा केली. काही आरोपींची आणि गुन्हेगारांची धिंड सुद्धा काढली होती. मात्र तरीही असे प्रकार होत आल्याने आश्चर्य व्यक्त होत आहे.