Thane Municipal कॉर्पोरेशन election : ठाणे : ठाणे महापालिकेच्या एकूण ३३ प्रभागातून निवडणूक लढण्यासाठी इच्छूकांसाठी मार्गदर्शन शिबीर आयोजित केले असून आज, गुरूवारी होणाऱ्या या शिबीराच्या माध्यमातून भाजपने एकप्रकारे स्वबळाची चाचपणी सुरू केल्याची चर्चा सुरू झाली आहे. असे असतानाच, या शिबिराच्या एक दिवस आधी ठाण्यात शिंदेच्या शिवसेनेची निवडणूकीच्या पार्श्वभूमीवर महत्वपूर्ण बैठक पार पडली. यात अनेक माजी नगरसेवक आणि पदाधिकाऱ्यांनी आगामी ठाणे महापालिका निवडणुका स्वबळावर लढण्याचा आग्रह धरल्याची माहिती सूत्रांनी दिली.
ठाणे जिल्ह्यातील महाविकास आघाडीतील भाजप आणि शिंदेची शिवसेना या पक्षांमध्ये गेल्या काही महिन्यांपासून आरोप प्रत्यारोप सुरू आहे. वनमंत्री गणेश नाईक हे उपमुख्यमंत्री एकनाथ शिंदेंवर टिका करण्याची एकही संधी सोडताना दिसून येत नाही तर, शिंदेच्या शिवसेनेचे खासदार नरेश म्हस्के हे गणेश नाईकांच्या टिकेला प्रत्युत्तर देत आहेt. आगामी पालिका निवडणुकांच्या तोंडावर दोन्ही पक्षांच्या नेत्यांमध्ये वाक युद्ध रंगले आहे. त्यामुळे ठाणे जिल्ह्यातील पालिका निवडणुका दोन्ही पक्ष स्वबळावर लढणार की महायुतीत लढणार याविषयी वेगवेळ्या चर्चा रंगल्या आहेत. अशातच दोन्ही पक्षातील पदाधिकाऱ्यांकडून स्वबळाचा आग्रह धरण्यास सुरुवात झाली आहे.
दोन दिवसांपूर्वी भाजपचे आमदार संजय केळकर यांनी निवडणुकीबाबत मोठे विधान केले होते. ठाण्याचा महापौर भाजपचा झाला पाहिजे, हिच आमच्या कार्यकर्त्यांची इच्छा आहे आणि आमचीही हीच भुमिका कायम राहीली आहे, असे मत केळकर यांनी व्यक्त केले होते. त्यापाठोपाठ ठाणे महापालिकेच्या एकूण ३३ प्रभागातून निवडणूक लढण्यासाठी इच्छूकांसाठी भाजपने मार्गदर्शन शिबीर आयोजित करून एकप्रकारे स्वबळाची चाचपणी सुरू केल्याची चर्चा सुरू झाली आहे. असे असतानाच, या शिबिराच्या एक दिवस आधी ठाण्यात शिंदेच्या शिवसेनेची निवडणूकीच्या पार्श्वभूमीवर महत्वपूर्ण बैठक पार पडली.
ठाण्यातील आनंद आश्रम येथे शिंदेच्या शिवसेनेचे खासदार नरेश म्हस्के यांच्या उपस्थितीत माजी नगरसेवक आणि पदाधिकाऱ्यांची संघटनात्मक आणि आगामी निवडणुकीच्या पूर्वतयारीसंदर्भात महत्वाची बैठक पार पडली. या बैठकीत महायुतीमधील भाजपबाबत नाराजीचा सूर उमटला. ठाण्यात शिवसेनेच्या माजी नगरसेवक आणि पदाधिकाऱ्यांकडून होत असलेल्या विकासकामांमध्ये भाजपचे काही पदाधिकारी अडथळे आणत असल्याच्या तक्रारी नगरसेवकांनी व्यक्त केल्या.
अनेक माजी नगरसेवक आणि पदाधिकाऱ्यांनी आगामी ठाणे महापालिका निवडणुका स्वबळावर लढण्याची मागणी बैठकीत केली. यावेळी खासदार नरेश म्हस्के यांनी नाराज माजी नगरसेवक आणि पदाधिकाऱ्यांची समजूत काढण्याचा प्रयत्न केला. त्यांनी सर्वांनी एकत्र राहून संघटन बळकट ठेवण्याचे आवाहन केले.