वसई : विरार ते दादर या लोकलच्या दरवाज्यात लटकत एका मनोरुग्ण तरुणाने गोंधळ घातला होता. चक्क महिलांच्या डब्यात डोकावून अश्लील शेरेबाजी केली असल्याची तक्रार प्रवाशांनी केली आहे.या घटनेची चित्रफीत ही समाजमाध्यमावर चांगलीच प्रसारित झाली आहे.

मुंबई लोकलने प्रवास करताना महिलांना निश्चितच धोक्यांचा सामना करावा लागतो. गर्दीमुळे होणारे गैरसोय, डब्यांमध्ये होणारी गुंडगिरी आणि छेडछाड, तसेच रात्रीच्या वेळी गर्दी नसलेल्या लोकल प्रवासात सुरक्षिततेची कमतरता या काही प्रमुख समस्या आहेत, ज्यामुळे हा प्रवास महिलांसाठी धोकादायक ठरू लागला आहे. त्यामुळे विविध घटना समोर येत आहेत. विरारमध्ये राहणारी ३२ वर्षीय स्वरा भोसले ही महिला ११ सप्टेंबर रोजी संध्याकाळी अंधेरीला जाण्यासाठी निघाली होती.विरारहुन संध्याकाळी ६ ची विरार- दादर लोकल तिने पकडली.चर्चगेटच्या दिशेने असलेल्या महिलांच्या डब्यात तुळरक गर्दी होती .

मात्र मिरा रोड स्थानक गेल्यानंतर महिला डब्याशेजारी असलेल्या लगेजच्या डब्यात चढलेल्या तरुणाने महिलांच्या डब्यात डोकावून अश्लील शेरेबाजी करायला सुरुवात केली.खिडकिजवळ बसलेल्या तीन परप्रांतीय तरुणी या प्रकाराने घाबरून दूसरीकडे जाऊन बसल्या.त्यानंतर त्या तरुणाने रागारागाने लोकलच्या डब्याच्या पत्रावर जोरजोराने बुक्के मारायला सुरुवात केली.या सर्व प्रकारामुळे महिलांच्या डब्यात भितीचे वातावरण पसरले होते.अखेर या त्रासाला कंटाळून स्वराने आपल्या कॅमेऱ्यात याचे चित्रीकरण केले.रेल्वे हेल्पलाईन ला देखील फोन केला.अंधेरी स्थानक येईपर्यंत हा प्रकार सुरू होता.अंधेरी स्थानकात सदर महिलेने पुरूषांच्या डब्यातील प्रवाशांना याबाबत विचारले असता तो मनोरुग्ण असून त्याला आतमध्ये बसवल्याचे सांगितले.

हेही वाचा

या घटनेची चित्रफीत फेसबुक व इन्स्टाग्रामवर मोठ्या प्रमाणात प्रसारित होत आहे.समाजमाध्यमांवर व्हिडिओ व्हायरल झाल्यानंतर त्या तरुणाचा आम्ही शोध घेत आहेत.रेल्वे डब्यातील प्रवाशांकडील चौकशीत तो तरुण मनोरुग्ण असल्याचे समोर आले आहे.महिलेने कोणतीही तक्रार केलेली नाही असे लोहमार्ग पोलीस ठाण्याचे वरीष्ठ पोलीस निरीक्षक भगवान डांगे यांनी सांगितले आहे.