Team India World Cup 2023 Jersey: पुढील महिन्यापासून मायदेशात होणाऱ्या आयसीसी एकदिवसीय विश्वचषकासाठी आदिदास (Adidas) ने टीम इंडियाच्या नवीन जर्सीचे अनावरण केले आहे. प्रसिद्ध भारतीय गायक रफ्तार यांनी गायलेल्या ‘३ का ड्रीम’ या गाण्याद्वारे बहुप्रतिक्षित जर्सी रिलीज करण्यात आली. ‘ड्रिम ऑफ ३’ हे लाखो चाहत्यांचे प्रतीक आहे जे भारतीय संघाला १९८३ आणि २०११ नंतर तिसरा एकदिवसीय विश्वचषक जिंकताना पाहण्याचे स्वप्न सत्यात उतरण्याची आतुरतेने वाट पाहत आहेत.
विश्वचषकासाठी भारतीय क्रिकेट संघाची नवी जर्सी लाँच करण्यात आली आहे. टीम इंडियाचे अधिकृत किट प्रायोजक आदिदासने बुधवारी (२० सप्टेंबर) एक व्हिडीओ शेअर केला. यामध्ये कर्णधार रोहित शर्मासोबत अनुभवी फलंदाज विराट कोहली, उपकर्णधार हार्दिक पांड्या, मोहम्मद सिराजसह अनेक खेळाडू दिसले. ५ ऑक्टोबरपासून भारतात विश्वचषक स्पर्धा होणार आहे. अंतिम सामना १९ नोव्हेंबर रोजी होणार आहे.
जर्सीवर तिरंग्याचे दोन स्टार आणि तीन रंग
आदिदासने जर्सीमध्ये बदल काही केले आहेत. खांद्यावरच्या तीन पांढऱ्या पट्ट्यांच्या जागी त्यांनी तिरंग्याच्या तीन रंगांचा समावेश केला आहे. छातीच्या डाव्या बाजूला बीसीसीआयच्या लोगोवर आता दोन स्टार आहेत, जे भारताच्या एकदिवसीय विश्वचषक विजयाचे प्रतीक आहे. ते दोन स्टार म्हणजे १९८३ आणि २०११चा विश्वचषक विजयाची खुण आहे.
भारताचा पहिला सामना ऑस्ट्रेलियाशी होणार आहे
भारतीय संघ ८ ऑक्टोबर रोजी चेन्नई येथे ऑस्ट्रेलियाविरुद्धच्या विश्वचषकात आपल्या मोहिमेची सुरुवात करणार आहे. टीम इंडिया १४ ऑक्टोबरला अहमदाबादमध्ये पाकिस्तानविरुद्ध खेळणार आहे. विश्वचषकापूर्वी भारतीय संघ ऑस्ट्रेलियाविरुद्ध तीन सामन्यांची वन डे मालिका खेळणार आहे.
आयसीसीने विश्वचषक २०२३चे अधिकृत गीत जाहीर केले
आयसीसी पुरुष क्रिकेट विश्वचषक २०२३ सुरू होण्यासाठी अवघे काही दिवस शिल्लक असताना, आयसीसीने या मोठ्या इव्हेंटचे अधिकृत गीत ‘दिल जश्न बोले’ जारी केले आहे. हे राष्ट्रगीत प्रख्यात बॉलिवूड संगीतकार प्रीतम यांनी संगीतबद्ध केले आहे. यामध्ये अभिनेता रणवीर सिंगची उपस्थिती आकर्षणात भर घालत आहे. तसेच, यात भारतीय संघाचा स्टार फिरकीपटू युजवेंद्र चहलची पत्नी धनश्री वर्मा देखील डान्स करताना दिसत आहे.
आगामी विश्वचषक २०२३साठी भारतीय संघ
रोहित शर्मा (कर्णधार), हार्दिक पांड्या (उपकर्णधार), शुबमन गिल, विराट कोहली, श्रेयस अय्यर, के.एल. राहुल (विकेटकीपर), रवींद्र जडेजा, शार्दुल ठाकूर, जसप्रीत बुमराह, मोहम्मद सिराज, कुलदीप यादव, मोहम्मद शमी, अक्षर पटेल, इशान किशन (विकेटकीपर), सूर्यकुमार यादव.