सातारा : येथील श्री पंचपाळी हौद दुर्गा माता मंदिर चॅरिटेबल ट्रस्टच्या वतीने शाहू नगरीत प्रथमच आयोजित केलेल्या सहस्त्रचंडी याग सोहळ्याला आज शनिवारी मोठ्या उत्साहात आणि हजारो देवी भक्तांच्या उपस्थितीत प्रारंभ झाला.
खासदार उदयनराजे भोसले व त्यांच्या पत्नी दमयंतीराजे भोसले यांच्या प्रमुख उपस्थितीत वेदमूर्ती ओंकार शास्त्री बोडस यांच्या मार्गदर्शनाखाली प्रधान संकल्प सोडून या सोहळ्याला प्रारंभ झाला. राजवाडा परिसरातील पंचपाळी हौद दुर्गा माता मंदिर परिसरात यानिमित्त मंडप उभारण्यात आला आहे. कोल्हापूर येथील साडेतीन शक्तीपीठापैकी एक श्री महालक्ष्मी देवीची स्थापना करण्यात आली आहे. यावेळी वेदमंत्रांच्या जयघोषात सुरू झालेल्या या सहस्त्रचंडी यागाचा प्रधान संकल्प खासदार उदयनराजे भोसले यांनी सोडल्यावर मंदिरातील दुर्गादेवीची विशेष पूजा संपन्न झाली. विविध जाती, धर्म आणि पंथातील १५१ देवी भक्तांनी सपत्नीक हा कार्यक्रम केला.
मंदिर चॅरिटेबल ट्रस्टच्या वतीने धनंजय देशमुख आणि विनायक शास्त्री चिखलगे यांच्या हस्ते उदयनराजे भोसले व दमयंती राजे भोसले यांचा सत्कार करण्यात आला. यावेळी वेदमूर्ती विवेकशास्त्री गोडबोले यांनी सहस्त्रचंडी महायाग, सप्तशती देवी स्तुती या विषयावर विस्तृत मार्गदर्शन केले. सायंकाळी गंधतारा ढोल पथकाच्या वतीने मंदिर परिसरात ढोल वादन करण्यात आले. समर्थ सेवा मंडळाचे अध्यक्ष श्री गुरुनाथ महाराज कोटणीस यांनी संत एकनाथ महाराजांच्या अभंगावर विस्तृत निरूपण केले. हे निरूपण प्रवचन पुढील दोन दिवस संपन्न होणार आहे.
वेदमूर्ती ओंकार शास्त्री बोडस व दिलीप शास्त्री अफळे यांनी या सहस्त्रचंडी महायागाचा प्रधान संकल्प या वेळी सादर केला. दमूर्ती ओंकार शास्त्री बोडस व दिलीप शास्त्री अफळे म्हणाले की ,संपूर्ण विश्वात शांतता निर्माण व्हावी .हिंदू राष्ट्राची स्थापना व्हावी ,तसेच सध्या सुरू असलेले मंदिराचे सरकारीकरण थांबावे .देवीची ५१ शक्तीपीठे जी विविध राष्ट्रात आहेत ,ती सर्व हिंदूस्थान या भारत देशाच्या भूमीत यावीत .तसेच पंचपाळे हौद दुर्गा माता मंदिराच्या वतीने संभाजी महाराजांची सृष्टी उभारण्याच्या तसेच गोशाळेच्या स्थापनेचा संकल्प या द्वारे करण्यात आला आहे .
सायंकाळी परगावाहून आलेल्या आणि यजमानपद भूषवलेल्या शेकडो यजमान आणि देवी अर्चना संपन्न केली. रविवार (दि.५) रोजी सकाळी नऊ ते दुपारी दोन या वेळेत सप्तशती पाठ वाचन व चंडी याग संपन्न होऊन दुपारी दोन ते पाच या वेळेत एक सहस्त्रकुमारीका पूजन म्हणजेच एक हजार बालकुमारींचे पूजन करण्यात येणार आहे. या सहस्त्रचंडी महायज्ञ यांच्या धार्मिक सोहळ्यासाठी पालकमंत्री शंभूराज देसाई, सार्वजनिक बांधकाम मंत्री शिवेंद्रसिंहराजे भोसले यांचे सह विविध मान्यवरांना उपस्थित राहण्याचे आवाहन करण्यात आले आहे..