फडणवीसांऐवजी विनोद तावडे असतील मुख्यमंत्री पदाचा चेहरा? भाजपाच्या अंतर्गत गटबाजीवर तावडेंनी दिलं उत्तर, म्हणाले…

केंद्रीय राजकारणातील विनोद तावडे यांची कामगिरी पाहता ते पुन्हा एकदा महाराष्ट्राच्या राजकारणात सक्रीय होतील. विनोद तावडे हे देवेंद्र फडणवीसांना डावलून महाराष्ट्राचे मुख्यमंत्री बनतील, अशी चर्चा सध्या सोशल मीडियात सुरू आहे. याबाबत प्रश्न विचारला असता विनोद तावडे यांनी स्पष्टपणे उत्तर दिलं आहे. आपल्याला महाराष्ट्राच्या राजकारणात काहीही रस नाही. आता ‘ओन्ली राष्ट्र, नो महाराष्ट्र’ असं उत्तर विनोद तावडे यांनी दिलं. ते ‘एबीपी माझा’च्या एका मुलाखतीत बोलत होते.

महाराष्ट्राच्या राजकारणात पुन्हा सक्रिय होण्याच्या चर्चेबद्दल विचारलं असता विनोद तावडे म्हणाले, “महाराष्ट्राच्या राजकारणात पुन्हा येण्याचा माझा मानस नाही. आता ‘ओन्ली राष्ट्र, नो महाराष्ट्र’. केंद्रीय स्तरावर राजकारण करताना तुम्हाला खूप शिकायला मिळतं. तुमची दृष्टी एकदम व्यापक होते. त्यामुळे मला मनापासून केंद्रातच काम करायला आवडेल,” असं उत्तर विनोद तावडेंनी दिलं.

हेही वाचा- “मी अपघाताने राजकारणात आलो”, सध्याच्या राजकीय स्थितीवर राज ठाकरेंचं भाष्य

भावी मुख्यमंत्री म्हणून महाराष्ट्रात तुमचा चेहरा असेल का? या सोशल मीडियावरील चर्चेबाबत विचारलं असता विनोद तावडे म्हणाले, “यामध्ये अजिबात तथ्य नाही. महाराष्ट्रात भारतीय जनता पार्टी देवेंद्र फडणवीस यांच्या नेतृत्वाखाली आणि चंद्रशेखर बावनकुळे यांच्या मार्गदर्शनाखाली काम करेल. सुधीर मुनगंटीवार, चंद्रकांत पाटील, पंकजा मुंडे यांची एक टीम आहे. हेच लोक टीम म्हणून महाराष्ट्रात काम करतील. मला महाराष्ट्रात येण्यात काहीही रस नाही, हे मी मनापासून सांगतो. मला केंद्रातल्या राजकारणातच काम करायला आवडेल.”

हेही वाचा- “…तेव्हा ‘लोकसत्ता’ माझ्यासाठी खूप मोठा होता”, राज ठाकरेंनी दिला आठवणींना उजाळा

भाजपातील अंतर्गत कुरघोडी, गटबाजी आणि देवेंद्र फडणवीस यांच्याबरोबर असलेल्या वादाबाबत विचारलं असता तावडे म्हणाले, “यात अजिबात तथ्य नाही. भाजपात दोन गट किंवा अमुक ग्रुप, तमुक ग्रुप असं अजिबात नाही. हे मी मनापासून सांगतोय, केवळ कॅमेरा समोर आहे म्हणून बोलतोय असं नाही. भाजपाची काम करण्याची एक पद्धत आहे. त्या पद्धतीने काम सुरू आहे. त्यामुळे आम्ही सगळे मिळून भाजपा महाराष्ट्रात मजबूत कसा होईल? यासाठी काम करत आहोत.”