बॉलिवूड अभिनेता रणबीर कपूरचा बहुचर्चित आणि बहुप्रतिक्षित ‘अ‍ॅनिमल’ या चित्रपटाची गेल्या काही दिवसांपासून सातत्याने चर्चा सुरु आहे. या चित्रपटाचा टीझर नुकताच प्रदर्शित झाला आहे. या टीझरमध्ये रणबीर कपूर, बॉबी देओल, अनिल कपूर आणि रश्मिका मंदाना यांचा जबरदस्त लूक पाहायला मिळत आहे.
अ‍ॅनिमल या चित्रपटाच्या टीझरमध्ये भरपूर अॅक्शन पाहायला मिळत आहे. या टीझरची सुरुवात रणबीर कपूर आणि रश्मिका मंदाना एकमेकांशी बोलताना दिसत आहेत. यावेळी रश्मिका ही रणबीरच्या वडिलांचा विषय काढते आणि तो चिडतो. यानंतर या चित्रपटात रणबीरच्या वडिलांची भूमिका साकारणारे अनिल कपूर पाहायला मिळत आहेत.
आणखी वाचा : Video : “स्वप्न खरी होतात…”, ‘वहिनीसाहेब’ धनश्री काडगावकरने ठाण्यात खरेदी केली दोन घरं, व्हिडीओत दाखवली झलक
यात अनिल कपूर हे रणबीरला मारताना दिसत आहेत. यानंतर रणबीर कपूरची दाढी, मिशी आणि केस वाढलेला लूक पाहायला मिळतो. तर या टीझरच्या शेवटी बॉबी देओलचा शर्टलेस लूक पाहायला मिळत आहे. या चित्रपटात रणबीर कपूर पहिल्यांदाच हिंस्त्र पात्र साकारताना दिसत आहे.
संदीप वांगा रेड्डी दिग्दर्शित हा चित्रपट याआधी ११ ऑगस्टला प्रदर्शित होणार होता. त्यानंतर या चित्रपटाच्या निर्मात्यांनी प्रदर्शनाच्या तारखेत बदल केला. आता हा चित्रपट या वर्षाच्या अखेरीस १ डिसेंबरला प्रदर्शित होणार आहे. हा चित्रपट हिंदी व्यतिरिक्त तेलुगू, कन्नड, मल्याळम आणि तामिळ अशा पाच भाषेत प्रदर्शित होणार आहे.
या चित्रपटात रणबीरसह अनिल कपूर, रश्मिका मंदाना, परिणीती चोप्रा, बॉबी देओल, सौरभ शूक्लासारखे कलाकार पाहायला मिळणार आहेत. या चित्रपटाच्या निमित्ताने पहिल्यांदाच रणबीर कपूर आणि रश्मिका मंदाना ही जोडी चाहत्यांच्या भेटीला येणार आहे. त्यामुळे सध्या हा चित्रपट चांगलाच चर्चेत आहे.