अभिनेता आयुष्मान खुराना सध्या त्याच्या ‘ड्रीम गर्ल २’ या चित्रपटामुळे चांगलाच चर्चेत आहे. गेल्या काही दिवसांपासून निर्मात्यांनी या चित्रपटाचे पोस्टर्स सोशल मीडियावर शेअर केले होते. आता नुकताच ‘ड्रीम गर्ल २’चा ट्रेलर रिलीज करण्यात आला. ‘ड्रीम गर्ल २’ हा आयुष्मान खुरानाच्या २०१९ मध्ये प्रदर्शित झालेल्या ‘ड्रीम गर्ल’चा सीक्वेल आहे. ‘ड्रीम गर्ल’ या चित्रपटाचे संपूर्ण कथानक ‘पूजा’ या पात्रावर आधारलेले आहे.
आयुष्मान चित्रपटात स्त्रीवेश परिधान करून पूजाचे पात्र साकारतो. ड्रीम गर्ल बॉक्स ऑफिसवर सुपरहिट ठरला होता. त्यामुळे आता प्रेक्षकांना ‘ड्रीम गर्ल २’ कडूनही अपेक्षा आहेत. ‘ड्रीम गर्ल २’च्या ट्रेलरमध्ये आयुष्मान खुराना कर्जबाजारी झाल्यामुळे पुन्हा एकदा पूजाचा स्त्रीवेश परिधान करून गाणी गाण्यास, फोनवर बोलण्यास सुरुवात करतो असे दाखवण्यात आले आहे. त्याच्यासह अभिनेत्री अनन्या पांडे यामध्ये मुख्य भूमिका साकारणार आहे.
आयुष्मानच्या अभिनयाचं सध्या सर्वत्र कौतुक होताना दिसत आहे. ‘अंधाधूंन’पासून आयुष्मान खुराना हे नाव बॉलिवूडमध्ये फारच लोकप्रिय झालं आहे. नुकतंच ‘ड्रीम गर्ल २’च्या ट्रेलर लॉंच सोहळ्यादरम्यान आयुष्मानने मनातील एक सुप्त इच्छा व्यक्त करून दाखवली. अन् ते ऐकताच तिथे उपस्थित असलेल्या प्रेक्षकांनी त्याला उत्तम दादही दिली.
‘ड्रीम गर्ल २’च्या ट्रेलर लॉंचदरम्यान आयुष्मान म्हणाला, “ह्यावेळी मला उत्तम अभिनेत्रीसाठी पुरस्कार मिळावा अशी माझी मनापसून इच्छा आहे, मी एवढं ड्रीम गर्लमध्ये काम केलं आहे तर एवढी अपेक्षा मी नक्कीच ठेवू शकतो.” आयुष्मानने या व्यक्त केलेली इच्छा ऐकून सगळेच मनसोक्त हसले. ‘ड्रीम गर्ल २’ चित्रपटात आयुष्मान खुराना आणि अनन्याबरोबर परेश रावल, असरानी, राजपाल यादव, मनजोत सिंग आणि अनु कपूर यांसारखे अनुभवी कलाकार देखील दिसणार आहेत. हा चित्रपट २५ ऑगस्टला प्रदर्शित होणार आहे.