बॉलिवूडचा चॉकलेट बॉय म्हणून अभिनेता कार्तिक आर्यन ओळखला जातो. गेल्या काही महिन्यांपासून दोस्ताना २ या चित्रपटामुळे कार्तिक चर्चेत आहे. कार्तिकच्या अनप्रोफेशनल वागण्यामुळे कार्तिकला बाहेरचा रस्ता दाखवण्यात आल्याचं कारण धर्मा प्रोडक्शनने दिलं होतं. त्यानंतर कार्तिकच्या चाहत्यांसमोर अनेक प्रश्न होते की कार्तिक आता कोणत्या चित्रपटात दिसेल. तर कार्तिकच्या चाहत्यांसाठी एक चांगली बातमी समोर आली आहे.
बॉलिवूडमधील लोकप्रिय निर्मात्यांपैकी एक म्हणजे साजिद नाडियाडवाल यांच्यासोबत आता कार्तिक काम करणार आहे. साजिद यांना बऱ्याच काळापासून कार्तिकसोबत काम करायचे होते. अखेर साजिदयांना कार्तिकसाठी एक उत्तम भूमिका मिळाली आहे. या भूमिकेत कार्तिक फिट होईल. दरम्यान, त्यांनी कार्तिकशी या चित्रपटासाठी चर्चा देखील केली आहे. साजिद यांच्या या आगामी चित्रपटाचे दिग्दर्शन मराठी दिग्दर्शक समीर विद्धवंस करणार आहेत, असे एका रिपोर्टमध्ये सांगण्यात आले आहे.
या चित्रपटासाठी काम करत असलेल्या एका व्यक्तीने सांगितले की, “कार्तिक आर्यन चॉकलेट बॉय म्हणून ओळखला जातो, म्हणून साजिद हे कार्तिकसाठी एका लव्हस्टोरीच्या शोधात होते. आता त्यांना लव्हस्टोरी मिळाली असून त्यात त्यांनी कार्तिकला घेण्याचा निर्णय घेतला आहे. कार्तिकने आता पर्यंत जितक्या चित्रपटांमध्ये काम केलं आहे. त्यापेक्षा ही भूमिका थोडी हटके असणार आहे.”
या चित्रपटाची निर्मिती ही साजिद नाडियाडवाला ग्रॅंडसन एंटरटेनमेंट आणि नमा: पिक्चर्स करणार आहेत. कार्तितसोबत कोणती अभिनेत्री मुख्य भूमिका साकारणार याची चर्चा अजूनही सुरु आहे.