Asambhav Teaser Release: सध्या अनेक चित्रपट प्रेक्षकांच्या भेटीला येत आहेत. मराठी चित्रपटांची मांदियाळी पाहायला मिळत आहेत. १० ऑक्टोबरला सकाळ तर होऊ द्या हा चित्रपट प्रदर्शित झाला आहे. १६ ऑक्टोबरला तू बोल ना हा सिनेमा प्रदर्शित झाला आहे. आता लवकरच असंभव हा सिनेमा प्रदर्शित होणार आहे. नुकताच या चित्रपटाचा टीझर प्रेक्षकांच्या भेटीला आला आहे.
टीझरमध्ये मुक्ता बर्वे सोबत काहीतरी अघटित घडताना दिसतंय. तिची घाबरलेली नजर, हवेलीतील गूढ शांतता आणि अचानक घडणाऱ्या घटनांमुळे प्रेक्षकांची उत्कंठा कमालीची वाढली आहे. मुक्ता बर्वे दुहेरी भूमिकेत आहे का? हा प्रश्नही सतत मनात घोळतो. दुसरीकडे प्रिया बापटही एका गूढ भूमिकेत झळकतेय, तिचं पात्र काहीतरी लपवतंय असं जाणवतं.
मुक्ता बर्वे व प्रिया बापट दिसणार एकत्र
हवेलीत काही गुपितं दडलेली आहेत, कुणाचा तरी खून होताना दिसतो, पण कोणाचा आणि का? सचित पाटील स्वतः या गूढाच्या शोधात आहे, तर संदीप कुलकर्णीचा या सगळ्याशी काय संबंध आहे? असे अनेक प्रश्न सध्या प्रेक्षकांना पडले आहेत.
या टीझरमध्ये भावनिक गुंतागुंत, थरार आणि अप्रत्यक्षित घटना पाहायला मिळतात. कलाकारांचा अभिनय खिळवून ठेवतो. या चित्रपटांचे शूटिंग उत्तराखंड राज्यातील नैनीतालमध्ये झाले आहे.
दिग्दर्शक, निर्माते सचित पाटील म्हणाले, “‘असंभव’ हा माझ्यासाठी केवळ रहस्यपट नाही, तर मानवी मनाच्या गाभ्यात डोकावण्याचा प्रयत्न आहे. प्रत्येक पात्रात एक गूढ आहे आणि ते उलगडत जाताना प्रेक्षकांचं मन हादरणार आहे. टीमने पूर्ण समर्पणाने काम केलं असून हा चित्रपट केवळ पाहाण्याचा नसून अनुभवण्याचा आहे.”
निर्माते नितीन प्रकाश वैद्य म्हणाले, “या चित्रपटात आम्ही पारंपरिक रहस्यपटाच्या चौकटीतून बाहेर जाऊन काहीतरी नवीन सांगण्याचा प्रयत्न केला आहे. पटकथा आणि दृश्यांची मांडणी इतकी गुंतवून ठेवणारी आहे की, शेवटपर्यंत तुम्ही ओळखू शकणार नाही. ‘असंभव’ हा मराठी सिनेमातील एक नवा प्रयोग ठरेल, असा आम्हाला विश्वास आहे.”
एरिकॉन टेलिफिल्म्सच्या शर्मिष्ठा राऊत, तेजस देसाई आणि पी अँड पी एंटरटेनमेंटचे मंगेश परुळेकर म्हणाले, “या प्रकल्पात तांत्रिकदृष्ट्या उत्कृष्टता साधणं हे आमचं प्रमुख उद्दिष्ट होतं. चित्रीकरण नैनितालसारख्या निसर्गरम्य ठिकाणी झालं आणि त्याने चित्रपटाला एक वेगळी ओळख मिळाली. प्रत्येक फ्रेम सिनेमॅटिक दृष्टिकोनातून विचारपूर्वक घडवली आहे. ‘असंभव’ प्रेक्षकांना थरार आणि सौंदर्याचा संगम अनुभवायला देईल.”
या चित्रपटाचं सहदिग्दर्शन पुष्कर श्रोत्री यांनी केलं असून, प्रमुख भूमिकेत सचित पाटील, मुक्ता बर्वे, प्रिया बापट आणि संदीप कुलकर्णी आहेत. ‘असंभव’ची निर्मिती मुंबई पुणे फिल्म्स एंटरटेनमेंटच्या सचित पाटील आणि नितीन प्रकाश वैद्य यांनी केली आहे. तर सह-निर्मिती एरिकॉन टेलिफिल्म्सच्या शर्मिष्ठा राऊत, तेजस देसाई आणि पी अँड पी एंटरटेनमेंटचे मंगेश परुळेकर तसेच संजय पोतदार यांनी केली आहे.
दरम्यान, प्रिया बापट व मुक्ता बर्वे यांनी २०१८ साली प्रदर्शित झालेल्या ‘आम्ही दोघी’ या चित्रपटात एकत्र दिसल्या होत्या. आता या दोघी पुन्हा एकदा एकत्र दिसणार असल्याने प्रेक्षक हा चित्रपट पाहण्यासाठी उत्सुक आहेत. २१ नोव्हेंबरला हा चित्रपट प्रदर्शित होणार आहे.