मुंबई : निलंबित प्रक्षिक्षणार्थी सनदी अधिकारी पूजा खेडकर हिचे वडील आणि माजी सनदी दिलीप खेडकर यांना प्रल्हाद कुमार चौहान अपहरण प्रकरणात उच्च न्यायालयाने गुरूवापी अटकेपासून दिलासा दिला. बेलापूर न्यायालयाने अटकपूर्व जामीन नाकारल्यानंतर खेडकर यांनी उच्च न्यायालयात धाव घेतली होती.
न्यायमूर्ती नितीन बोरकर यांच्या एकलपीठा पुढे खेडकर यांची याचिका सुनावणीसाठी आली. त्यावेळी, सविस्तर युक्तिवाद ऐकल्यानंतर न्यायालयाने खेडकर यांना अटकपूर्व जामीन मंजूर करण्यात आला. त्याचवेळी, कुमार याला सहा आठवड्यांत चार लाख रुपयांची भरपाई देण्याचे, तसेच एक लाख रुपये पोलिस कल्याण निधीमध्ये जमा करण्याचे आदेश न्यायालयाने खेडकर यांना दिले. या प्रकरणी चालक प्रफुल्ल याला अटक झाली असून तो न्यायालयीन कोठडीत आहे.
प्रकरण काय ?
दोन महिन्यांपूर्वी, १३ सप्टेंबर रोजी मुलुंड ऐरोली मार्गांवर सिमेंट मिक्सर गाडी आणि एका कारचा किरकोळ अपघात झाला होता. कार चालक प्रफुल्ल साळुंखे आणि खेडकर यांनी कारची नुकसान भरपाई दिली नाही म्हणून मिक्सर चालक प्रल्हाद कुमार चौहान याचे अपहरण करून पुणे येथील औंध येथील बंगल्यात डांबून ठेवले होते.
या प्रकरणी रबाळे पोलीस ठाण्यात गुन्हा दाखल होताच रबाळे पोलिसांनी तांत्रिक तपासाच्या मदतीने शोध घेत खेडकर यांच्या घरी पोहचले. त्या ठिकाणी खेडकर याची पत्नी मनोरमा हिने पोलिसांना घरात येऊ दिले नाहीच, शिवाय त्यांच्या अंगावर कुत्रे सोडले. रबाळे पोलिसांनी या प्रकरणी तक्रार दाखल करून चतुश्रृंगी पोलीस ठाण्यात गुन्हा दाखल केला होता. तेव्हापासून खेडकर फरार होते.