मुंबई : अनधिकृत वाहनांतून होणाऱ्या विद्यार्थी वाहतुकीला अटकाव करण्यासाठी आता स्कूल व्हॅन्सची संख्या वाढवण्याचा निर्णय परिवहन विभागाने सुरू केला असून स्कूल व्हॅन परवाने वाटप खुले करण्यात आले आहे. याबाबतची अधिसूचना लवकरच प्रसिद्ध होईल, अशी माहिती अशी माहिती परिवहन मंत्री प्रताप सरनाईक यांनी दिली

विद्यार्थ्यांना दररोज वेळेत शाळेत पोहचवण्यासाठी पालकांची धावपळ सुरू असते. अनेक शाळांची स्वत:ची विद्यार्थी वाहतुकीची व्यवस्था आहे. मात्र शालेय बसचे शुल्क सर्व पालकांना परवडणारे नसल्याने तुलनेने कमी पैशात खासगी वाहन, रिक्षातून विद्यार्थ्यांना शाळेत पाठवण्याकडे पालकांचा कल असतो. वैध परवाना नसणे, शालेय बसची योग्यता प्रमाणपत्राची मुदत संपणे, रिक्षा किंवा टॅक्सीमधून क्षमतेपेक्षा जास्त विद्यार्थ्यांची ने-आण करणे, असे प्रकार सातत्याने उघडकीस येत असतात.

या पार्श्वभूमीवर परिवहन विभागाची पालक, बस संघटना प्रतिनिधी यांच्या उपस्थितीत झालेल्या बैठकीत अनधिकृत वाहनांतून विद्यार्थी वाहतूक होत असल्याची चर्चा झाली. विद्यार्थी वाहतुकीसाठी केंद्र सरकारने शालेय बस नियमावलीचा (ऑटोमोटिव्ह इंडस्ट्री स्टँडर्ड्स अर्थात एआयएस-०६३) आधार घेऊन अद्यावत मानके अर्थात शालेय व्हॅन नियमावली (एआयएस-२०४) तयार करण्यात आली आहे. ही मानके पूर्ण करणाऱ्या वाहनांना विद्यार्थ्यांच्या वाहतुकीसाठी परवानगी देण्यात येणार आहे. हे परवाने खुले करण्यात आले असून लवकरच त्याबाबतची अधिसूचना प्रसिद्ध करण्यात येईल, अशी माहिती सरनाईक यांनी दिली.

हेही वाचा

विद्यार्थ्यांच्या सुरक्षित वाहतूकीला प्रथम प्राधान्य आहे. सुरक्षित वाहतुकीसह बेरोजगारांना रोजगाराची संधी देण्यासाठी शालेय व्हॅनला मंजुरी दिली आहे. नव्या शालेय व्हॅनमधून विद्यार्थी वाहतुकीचा व्यवसाय सुरू करणाऱ्यांना राज्य सरकारकडून परवाने देण्यात येतील. राज्य सरकारकडून परिवहन विभागामार्फत २०१८ पर्यंत शालेय व्हॅनसाठी परवाने देण्यात येत होते. मात्र शालेय व्हॅन विद्यार्थी वाहतुकीसाठी असुरक्षित असल्याचे सांगत न्यायालयात याचिका दाखल केली होती. केंद्राच्या मानकानुसार राज्य शासनाने नियमावली तयार करून व्हॅन सुरू करण्याबाबतची नियमावली प्रसिद्ध केली आहे. त्याआधारे राज्य सरकारने हे धोरणात्मक पाऊल टाकले असून या संदर्भात अधिसूचना जारी होईल, असे मंत्री सरनाईक यांनी सांगितले.

विद्यार्थी वाहतूक करण्यासाठी वाहन कसे हवे?

  • सीसीटीव्ही आणि डॅशबोर्डवर स्क्रीन
  • जीपीएस
  • अग्निशमन अलार्म प्रणाली
  • दरवाजा उघडा राहिल्यास अलार्म यंत्रणा
  • ताशी ४० वेगमर्यादेसह स्पीड गव्हर्नर
  • पॅनिक बटण, आपत्कालीन दरवाजे
  • लहान विद्यार्थ्यांना प्रवेशासाठी पायरी
  • गाडीच्या टपावर शाळेचे नाव