Pushpa 2 : ‘पुष्पा २’च्या शो दरम्यान भर थिएटरमध्ये अज्ञाताने फवारला विषारी गॅस; मुंबईत नेमकं काय घडलं? पहा व्हिडिओ

वांद्रे येथील गॅलेक्सी थिएटरमध्ये ‘पुष्पा २ द रुल’ चा शो सुरू असताना अज्ञात व्यक्तीने विषारी गॅस फवारल्याने अनेक प्रेक्षकांना खोकला, घशात जळजळ आणि उलट्या झाल्याचे वृत्त एएनआय या वृत्तसंस्थेने दिले आहे. या संपूर्ण प्रकरणानंतर चित्रपटाचे प्रक्षेपण १५ ते २० मिनिटे थांबवण्यात आले होते. मुंबई पोलिसांना या सर्व प्रकरणाची माहिती मिळाल्यानंतर त्यांनी, वांद्रे येथील गॅलेक्सी थिएटरची तपासणी केली.

काय म्हणाले प्रेक्षक?

‘पुष्पा २ द रुल’च्या शो दरम्यान घडलेल्या या प्रकाराबद्दल एएनआयशी बोलताना एक प्रेक्षक म्हणाला, “मध्यांतर झाल्याने आम्ही थिएटरबाहेर आलो होतो. पण पुन्हा आत गेल्यानंतर कोणतही काहीतर फवारल्यामुळे अनेक प्रेक्षक खोकत असल्याचे दिसले. त्यानंतर १० मिनिटे चित्रपटाचे प्रक्षेपण थांबवण्यात आले होते.”

याबाबत बोलताना आणखी एक प्रेक्षक म्हणाला, “मध्यांतरानंतर परत जाताच आम्हाला खोकला येऊ लागला. आम्ही बाथरूममध्ये जाऊन उलट्या केल्या. १०-१५ मिनिटे गॅसचा वास तसाच राहिला. दरवाजे उघडल्यानंतर वास नाहीसा झाला. त्यानंतर चित्रपट पुन्हा सुरू झाला.”

हैदराबादच्या संध्या थिएटरमध्ये महिलेचा मृत्यू

४ डिसेंबर रोजी अभिनेता अल्लू अर्जुनचे चाहते ‘पुष्पा २ द रुल’ या चित्रपटाच्या प्रीमियर शोपूर्वी हैदराबादच्या संध्या थिएटरमध्ये जमले होते. यावेळी अल्लू अर्जुन तेथे पोहोचताच, चाहते त्याची एक झलक पाहण्यासाठी धडपडताना दिसले. यावेळी चेंगराचेंगरी झाली, त्यामुळे जमावाला नियंत्रणात आणण्यासाठी पोलिसांनी लाठीचार्ज केला. या सर्व गोंधळात एका महिलेचा मृत्यू झाला तर एक मुलगा जखमी झाला.

हे ही वाचा : “जराही रोमँटिक नाहीस तू…”, तेजूच्या हळदीत तुळजा सूर्यावर रूसणार; ‘लाखात एक आमचा दादा’ मालिकेचा प्रोमो पाहिलात का?

गुजरातमध्ये प्रेक्षकांकडून तोडफोड

गुरुवारी वडोदरा आणि जामनगरमधील मल्टिप्लेक्समध्ये पुष्पा 2 चित्रपटाच्या फर्स्ट डे फस्ट शोच्या प्रक्षेपणास उशीर झाल्याने चाहत्यांनी गोंधळ घातला. यावेळी वडोदरातील, मांजलपूर परिसरात असलेल्या मल्टिप्लेक्समध्ये प्रेक्षकांनी वेटिंग एरियाच्या बाहेर चित्रपटाचे पोस्टर्स आणि साहित्याची तोडफोड केली.