मुंबई : मतदानाला अवघे दोन दिवस शिल्लक राहिले असून वरळी मतदारसंघात विद्यमान आमदार आणि शिवसेनेचे (उद्धव ठाकरे) उमेदवार आदित्य ठाकरे यांना विरोधकांनी अनोखे आव्हान दिले आहे. शिवसेनेच्या (एकनाथ शिंदे) कार्यकर्त्यांनी वरळीत ठिकठिकाणी ठाकरे यांना भविष्याच्या चर्चेचे आव्हान दिले आहे. अशी पत्रके लावलेल्या खुर्च्या जागोजागी ठेवल्या आहेत.
आदित्य ठाकरे वरळी मतदारसंघातून दुसऱ्यांदा निवडणूक लढवत असून त्यांची कोंडी करण्यासाठी विरोधकांनी तयारी केली आहे. शिवसेनेचा बालेकिल्ला असलेल्या या मतदारसंघातील लढत लक्षवेधी ठरणार आहे. या मतदारसंघात आदित्य ठाकरे यांच्या पक्षातील कार्यकर्त्यांचा जोरदार प्रचार सुरू आहे. शिवसेनेने (एकनाथ शिंदे) खासदार मिलिंद देवरा यांना निवडणुकीच्या रिंगणात उतरवले आहे. वरळीमधील अनेक ठिकाणी रविवारी सकाळी काही विशिष्ट मजकूर लिहिलेल्या खुर्च्या निदर्शनास आल्या. वरळीच्या भविष्याच्या चर्चेचे आव्हान आदित्य स्वीकारणार का असा सवाल करणाऱ्या या खुर्च्या लक्ष वेधून घेत होत्या.
© The Indian Express (P) Ltd