भंडारा : बहिण भावाच्या नात्याला काळीमा फासणारी धक्कादायक घटना भंडारा जिल्ह्यात समोर आली आहे. मावस भावाकडून अत्याचार व मावशीच्या नातेवाइकांकडून धमकी मिळाल्यामुळे एका युवतीने गळफास घेऊन जीवन संपवले. ‘सुसाइड नोट’मध्ये तिने आरोपींची नावे लिहून त्यांना तिच्या मृत्यूस कारणीभूत ठरवले आहे.
पीडिता शिक्षण घेण्यासाठी तिच्या मावशीकडे राहत होती. मावशीकडे आपले लेक सुरक्षित आहे असे आई-वडिलांनाही वाटत होते. मात्र, मावशीच्या मुलांनी तरुणीवर अत्याचार करण्यास सुरुवात केली. भीतीपोटी सुरुवातीला तरुणी काहीही बोलत नव्हती मात्र वारंवार होणाऱ्या अत्याचारामुळे ती त्रस्त झाली आणि तिच्यावर झालेल्या अत्याचाराची कथन मावशीकडे केले. मात्र, बहिणीच्या लेकीवर अत्याचार करणाऱ्या आपल्या लेकाला रागवण्याची मावशीने प्रकरण दाबण्याचा प्रयत्न केला व पीडितेलाच ती धमकाऊ लागली.
मावस भावाकडून झालेला अत्याचार आणि मावशीच्या नातेवाईकांकडून मिळालेल्या धमकीमुळे त्रस्त झालेल्या एका युवतीने गळफास लावून आत्महत्या केली. आत्महत्येपूर्वी तिने छळणाऱ्या आरोपींची नावे सुसाइड नोटमध्ये लिहून तेच माझ्या मृत्यूला कारणीभूत असल्याचे म्हटले आहे. ही घटना मोहरणा येथे घडली.
या प्रकरणी पोलिसांनी इटान येथील राजेश रमेश गजभिये, नंदा रमेश गजभिये, राहुल रमेश गजभिये, रमेश गजभिये व शालू ऊर्फ शीतल ओंढरे यांच्यावर आत्महत्येस प्रवृत्त केल्याप्रकरणी गुन्हा दाखल केला आहे.
मृत युवती ही गेल्या दोन वर्षांपासून इटान येथील सदर आरोपींसोबत राहत होती. यादरम्यान आरोपी राजेशने तिच्यावर बळजबरीने अत्याचार केल्याचे सुसाइड नोटमध्ये लिहिले आहे. ही बाब इतर आरोपी नातेवाइकांना कळल्यावर त्यांनी संगनमत करून तिला मारहाण केली तसेच प्रकरण बाहेर उघड न करण्यासाठी दबाव आणला.
दरम्यान, साधारण पंधरा दिवसांपूर्वी मृत युवती ही वडिलांच्या घरी परतली होती. मात्र, १५ ऑगस्ट रोजी तिने घरी कोणीही नसल्याची संधी साधून नॉयलॉन दोरीने गळफास लावून आत्महत्या केली. पंचनामा करताना मृत युवतीने आत्महत्येपूर्वी लिहिलेल्या चिठ्ठीत संबंधित आरोपींमुळेच आत्महत्या करत असल्याचे नमूद केले आहे. त्याच्या आधारावर मृत मुलीच्या वडिलांनी पोलिसात तक्रार दिली.