यवतमाळ जिल्ह्यात बाजोरीया, नाईक, उकंडेंसह ७७ जणांची माघार…आता मैदानात…

यवतमाळ, दिग्रस, पुसद, उमरखेड, आर्णी, राळेगाव व वणी या सात मतदारसंघात १७९ उमेदवारी अर्ज दाखल करण्यात आले होते. आज नामांकन परत घेण्याच्या अखेरच्या दिवशी यापैकी ७७ उमेदवारांनी अर्ज मागे घेतले. यवतमाळ मतदारसंघात १३ उमेदवारांनी अर्ज मागे घेतल्याने आता २२ उमदेवार रिंगणात आहेत. वणी मतदारसंघात चार उमेदवारांनी अर्ज मागे घेतले. येथे आता १२ उमेदवार रिंगणात आहेत. राळेगावमध्ये सात जणांनी माघार घेतल्याने ११ जण निवडणूक लढवित आहेत. दिग्रसमध्ये चार जणांनी माघार घेतली. येथे १३ उमेदवार रिंगणात आहेत. आर्णीमध्ये सात उमदेवारांनी माघार घेतल्याने १४ उमेदवारांमध्ये लढत होईल. पुसदमध्ये १७ उमेदवारांनी माघार घेतली तर १३ उमेदवार रिंगणात आहेत. उमरखेडमध्ये २५ जणांनी माघार घेतल्याने १७ उमदेवार रिंगणात आहेत. सर्वाधिक २२ उमेदवार यवतमाळ विधानसभा मतदारसंघातून निवडणूक रिंगणात उतरले आहे. सर्वांत कमी ११ उमेदवार राळेगावमधून लढत आहेत.

हेही वाचा…अमरावती जिल्हयात अनेकांच्‍या तलवारी म्‍यान…पण, सात बंडखोर मात्र…

यवतमाळमध्ये महाविकास आघाडीचा धर्म पाळला जावा या हेतूने उमेदवारी मागे घेऊन राष्ट्रवादी काँग्रेस (शरद पवार)चे प्रदेश उपाध्यक्ष संदीप बाजोरीया यांनी काँग्रेस उमेदवाराला पाठिंबा दर्शविला. मात्र यवतमाळात काँग्रेस उमेदवाराचा प्रचार करणार नसल्याचेही त्यांनी सांगितले. पुसदमध्ये नाईक कुटुंबात वाद निर्माण झाल्याने महायुतीतील राष्ट्रवादी काँग्रेस (अजित पवार) चे उमेदवार इंद्रनील नाईक यांच्याविरोधात अपक्ष उमदेवारी दाखल करणारे त्यांचे मोठे बंधू ययाती नाईक यांनी माघार घेतली. त्यामुळे नाईक कुटुंबाने सुटकेचा नि:श्वास टाकला आहे. आर्णी मतदारसंघात भाजपचे राजू तोडसाम यांच्या विरोधात शिवसेना शिंदे गटाचे डॉ. विष्णू उकंडे यांनी अपक्ष उमेदवारी दाखल केली होती. मात्र पक्षातील वरिष्ठ नेत्यांनी समजूत घातल्यांनतर डॉ. उकंडे यांनी माघार घेतली. यामुळे यवतमाळात महाविकास आघाडीला तर पुसद व आर्णीमध्ये महायुतीच्या उमदेवाराला दिलासा मिळाला आहे.

हेही वाचा…‘भाजप’कडून फराळ वाटप नियमात, मात्र संविधान जागर नियमबाह्य.. हा कोणता कायदा?

वणी व उमरखेड मतदारसंघात मात्र महाविकास आघाडीला बंडखोरांची समजूत घालण्यात अपयश आले. वणी येथे महाविकास आघाडीकडून शिवसेना ठकारे गटाचे संजय देरकर रिंगणात आहेत. त्यांच्या विरोधात काँग्रेसचे संजय खाडे यांनी अपक्ष उमेदवारी अर्ज दाखल केला. मात्र अनेकांनी समजूत घालूनही त्यांनी उमेदवारी कायम ठेवल्याने वणीत महाविकास आघाडीतील दुफळी भाजपच्या पथ्यावर पडण्याची चिन्हे आहेत. उमरखेडमध्ये महाविकास आघाडीने काँग्रेसचे साहेबराव कांबळे यांना उमेदवारी दिल्याने माजी आमदार विजय खडसे यांनी अपक्ष उमदेवारी दाखल केली. खडसे यांनीही काँग्रेस नेत्यांना न जुमानता उमदेवारी कायम ठेवल्याने महाविकास आघाडीत बिघाडी झाली. येथे भाजपचे माजी आमदार राजेंद्र नजरधने हे मनसेकडून निवडणूक लढवत असल्याने महायुतीचीही अडचण झाली आहे.